Tradicionalmente ta existi solamente un forma di convivencia cu ta regula pa ley y esaki ta matrimonio. Awendia e ta algo hopi comun cu un pareha ta scoge pa biba hunto sin drenta enlace matrimonial. E decision aki ta trece cune cu e pareha no lo conta cu e derecho y obligacion nan cu un pareha casa lo tin.
Algun ehempel di esaki ta e derecho di carga fam di bo pareha, derecho di pensioen y tambe e derecho di ta e heredero legal di otro (al menos cu esaki a wordo palabra di un otro forma). Den e sociedad moderno cu nos ta bibando aden tin varios tipo di convivencia. Bo tin parehanan cu ta simplemente biba hunto, bo tin otronan cu ta scoge pa convivi hunto a base di un contracto di convivencia (samenlevingsovereenkomst), tambe ta existi e famoso sociedad registra (geregistreerd partnerschap) y por ultimo bo tin parehanan cu ta drenta enlace matrimonial.
Cada persona ta liber pa scoge e forma di convivencia cu e ta desea. Sinembargo tin cu menciona cu matrimonio ta e unico forma di convivencia cu ta wordo regula den nos Codigo Civil. Na momento cu un pareha casa tuma e decision di separa y divorcia, e pareha tin derecho riba entre otro pensioen y partneralimentatie (al menos cu a tuma e decision di desvia di esaki).
Con ta para awo cu e pareha cu nunca a casa, pero si a convivi hunto añanan largo? E pareha aki tambe tin derecho riba pensioen? E tin derecho riba partneralimentatie? Na momento cu un relacion amoroso termina caminda simplemente tabata biba hunto, bo no tin derecho riba pensioen, pero alimentacion si ta algo cu e lo por disfruta di dje. Importante pa remarca ta cu nos Codigo Civil tin un solo articulo cu ta brinda proteccion na e pareha cu a keda desampara despues di terminacion di un relacion duradero.
Articulo 1:408b di nos Codigo Civil ta stipula lo siguiente:
Si dos persona a biba hunto durante hopi tempo, como si fuera nan tabata casa y e convivencia aki a termina pa un otro motibo cu no ta morto, den e caso aki e hues por dicidi, si esaki ta rasonabel, pa paga e otro pareha un uitkering tot levensonderhoud riba peticion di e pareha.
E termino ‘biba hunto como si fuera nan tabata casa’ tin 4 criteria acumulativo mara na dje segun hurisprudencia:
- Na prome luga mester por papia di un relacion afectivo di un caracter duradero (affectieve relatie van duurzame aard);
- Na di dos luga mester por papia di un convivencia (samenwoning);
- Na di tres luga mester tabata tin un cuidado mutuo, es decir wederzijdse verzorging;
- Y por ultimo mester por papia di un hogar comun.
Den e segundo parti di e articulo aki nos lo continua na elabora riba e tema aki. E evaluacion di un caso specifico trata door di Corte di Prome Instancia na aña 2017 lo ta e parti central di parti II di e comunicado aki. Ta spera cu por a informa e lector un poco tocante e topico aki.
Sosten financiero na e ex-pareha no casa despues cu e relacion termina Part 2
Den e prome parti di e articulo aki nos a subraya e derecho di e ex-pareha no casa ora cu tin un separacion. Nos a elabora riba 4 criteria acumulativo determina for di hurisprudencia cual ta duna un ex-pareha no casa e derecho pa ricibi pago di alimentacion. Pa por ilustra e situacion aki lo nos pone enfasis riba e decision di hues den un caso cu a wordo trata den nos Corte di Prome Instancia na aña 2017.
E hechonan ta lo siguiente:
- Partidonan a muda hunto na aña 1991 y na aña 2004 a sera un hypotheek hunto pa un pida tereno. Partidonan tabata tin mas cu 20 aña ta biba hunto;
- E homber a traha un testament y a stipula den esaki si acaso e fayece, e ta laga su pareha como e unico heredero di su herencia;
- Relacion a termina y e señora a pidi un suma di Afl. 1.750,- pa luna na uitkering tot levensonderhoud mirando cu su entrada tabata un suma di Afl. 506,- pa luna na pensioen;
- E homber su salario tabata aproximadamente Afl. 5.300,- netto pa luna
Na momento di evalua un tipo di solicitud manera esaki, mester tene cuenta cu e grado di necesidad di parti di e solicitante y di otro banda mester tene cuenta cu e capacidad financiero di e otro partido.
Den e caso aki, considerando tur e pruebanan cu a wordo treci dilanti door di e solicitante y tambe e grado di necesidad cu e tabata tin, hues a honra su peticion y a ordena e homber pa paga su ex-pareha e suma di Afl. 1.750,- pa luna.
Cu esaki nos por conclui cu tambe parehanan cu tabata biba hopi aña hunto, por conta cu un tipo di sosten cu ta wordo regla pa ley.
Tienda di Ley a wordo forma door di un grupo di studiantenan di ley y tambe huristanan cu pa dos aña caba ta brindando asistencia huridico na nos comunidad di Aruba. Durante e existencia di Tienda di Ley nos a publica diferente articulonan huridico. Nos a trata diferente topiconan di nos Codigo Civil, Ley Constitucional, pero tambe Codigo Penal, Ley Administrativo y Ley di Labor. Nos meta no ta pa solamente brinda asistencia huridico na nos comunidad, sino tambe informa nos pueblo y comunidad di nan derechonan. Cada ciudadano di Reino Hulandes ta suppose di conoce e leynan, pero hopi biaha pa falta di transparencia esaki no ta sosode.
E hecho cu nos leynan mayoria biaha ta dificil pa compronde tambe ta hunga un rol. Pa e motibo aki nos ta purba di hinca e articulonan mas simpel cu nos por den otro na Papiamento, pero no tur biaha tin palabranan huridico exacto cu por wordo uza. Ta spera cu por a informa e lector un poco tocante e topico aki. Si bo persona tin pregunta, algun sugerencia pa un proximo topico di ley of ta desea asistencia huridico por tuma contacto cu nos via nos facebook page: Plataforma Hobennan Profesional of nos e-mail: [email protected].
