Ta trata aki di dos hoben, moviendo den un auto marca Toyota modelo Tercel sin number y sin ningun documento den e auto, coriendo sospechoso den Sero Patrishi. A core pa polis pero despues di persecucion, awor nan tin cu duna cuenta pa e auto cu nan no por prueba cu ta di nan, pa a core pa polis y pa dos arma di candela cu a haya den e vehiculo. Ta mustra asina cu nan tabatin un plan pa sea tira un hende den bario of kisas comete un atraco arma. Polis a logra evita esaki dor di a para nan y kita dos criminal mas for di caya!
Un rato pasa pa 4:00pm a tuma luga un persecucion den area di Sero Patrishi. Polis a nota un auto sospechoso sin number y mirando e dos hombernan den e auto, a dicidi di duna nan señal pa para pa un control rutinario. Pero, e chauffeur a dicidi di nenga e ordo di polis y a aumenta velocidad pa purba scapa di e defensornan di ley. Esey no a dura mucho pasobra nan a core yega un cas y ey polis a changa nan di tur banda y a detene ambos, prome cu nan kier a purba haci algo malo mes!
Nan a core cu e auto y a yega na e cas situa na e adres Sero Patrishi # 267. Ey a detene ambos hoben. Durante listramento riba nan paña y den e auto mes a bin topa cu dos arma di candela y di biaha a pidi pa transporte policial p’e dos detenidonan peligroso aki. E team forensico di polis a presenta tambe na e sitio pa haci un investigacion y asina prueba despues dilanti Hues cu ta di nan mes e arma ta, basa riba nan vingerprints, etc.
Desde trempan a drenta informacion di un draaimento di auto y di haci maniobranan peligroso riba caminda publico, pero na momento cu polis a yega na e sitio y duna ordo pa para, e chauffeur no a haci caso. Esey a pone cu a cuminsa un persecucion. Unidadnan motorisa y polisnan cu cachonan di e unidad K-9 tambe a presenta na e sitio pa sostene nan coleganan den e persecucion y pa evita cu e hobennan ta purba di resisti contra nan detencion.
