Diabierna 10:00 pm un patruya di polis purba para un auto marca Honda modelo Accord color blanco, na altura di Sero Pita. Polis kier a haci un control rutinario, pero e chauffeur a dicidi di no cumpli cu e instruccion y a ranca bay direccion Piedra Plat.
Mesora Polis a sigui su tras. Yegando na altura di “Mandingo Snack” e chauffeur a baha for di caminda na e bocht y a ranca un spandraad di e pal’i luz band’i caminda. Esaki a pone cu e bumper parti dilanti di e auto a kita. E auto mes a drenta den un cura y aki e chauffeur a bula sali for di su auto y a core drenta mondi.
A pidi resfuerso y diferente patruya a presenta y a cuminsa un buskeda den e mondi pa e sospechoso. Ilumina pa e luz potente di helicopter cu tambe a bin yuda, a busca bou tur mata pa e homber. A dura un rato, pero finalmente polis a logra haya e chauffeur cu tabata drumi scondi den tur e yerbanan.
A deten’e mesora y a laga transportwagen hib’e pa Warda di Polis. Ey lo present’e dilanti un Fiscal Auxiliar pa duna cuenta di su acto y la dicidi riba su encarcelacion of libertad. Ta acus’e di no sigui instruccion di polis, di a core di forma irresponsabel, di trece trafico na peliger y di a comete hit and run.
