Diadomingo mainta polis a wordo pidi cu urgencia na altura di Hangout, cu ta keda net p’abao di Centro Medico. Segun informacion a drenta, tin un pelea pisa andando y tambe tin hende herida.
Na momento cu polis a yega, nan a mira un KIA Shinishi sali cu velocidad halto for di e sitio. Nan no a logra yega na e auto.
Segun informacion un grupo di hende cu lo a agredi un otro persona na Hangout, lo mester a huy di e luga. Tabata papia caba di prome instante cu tabata tin un hende herida. Nan lo a dal e persona. E no tabata grave si. Polis a tuma declaracion. Mas despues a yega tambe un testigo cu a bin splica polis kico ta loke a pasa na Hangout, na momento cu un grupo di hende lo mester a agredi un otro.
Polis tin atencion pa e caso. Ta trata di un KIA shinishi cu awo tin cu busca pa sa kendenan tabata den e auto y tambe lo mester bay atende cu e problema cu a surgi na Hangout.
