E siman aki na diferente caminda na Aruba ta celebra “Housekeeping week”. Paviljoen ta celebra henter siman cu diferente actividad. Awe a tuma luga e apertura y mañan e celebracion lo sigui cu misa, lunch, bingo y ta cera e dia cu un fiesta na Sta. Theresita San Nicolas.
Paviljoen tin casi 300 empleado y na e casnan tin mas o menos 100. E instancia tin hopi pashent y nan tin hopi pasion pa kico nan ta traha. Nan tin hopi pasion pa tipo di evento asina aki, Ivy Goeloe-Peterson, Activiteit begeleider di Paviljoen, a bisa. Nan ta uza nan tempo liber pa haci actividad pa hendenan grandi y empleadonan di housekeeping.
Un mensahe cu Goeloe-Peterson a manda ta pa respeta esunnan cu ta traha den housekeeping, pasobra nan ta haci un trabou duro tur dia. “Duna nan respet, duna nan amor, hari cu nan y pa hendenan grandi bin bishita nan,” asina el a bisa. El a sigui agrega pa pasa na Saba San Nicolas, Playa y Savaneta pa pasa un tempo cu e hendenan grandi.
