Biblioteca Nacional Aruba ta invita mucha y adulto pa un presentacion di escritor di buki,
Paul van Loon. Esaki specialmente pa e di 25 edicion di Festival di buki pa mucha 2017. Paul
van Loon ta un escritor di buki pa mucha y su genero preferi ta suspenso.
Den pasado Paul van Loon a participa na dos ocacion na e Festival di Buki pa Mucha, na 1995 y 1998. E muchanan cu e tempo ey tabata gusta lesa Paul van Loon y a haya bishita di dje na scol awendia ta adulto cu te ainda ta fan di e escritor di buki pa mucha di fama mundial. Paul van Loon a skirbi masha hopi buki mes y ta bon conoci pa su serie ‘Griezelbus’. Su bukinan a keda traduci den varios idioma. Ademas di e presentacion di Paul van Loon lo tin un “jamsession” di varios di e autornan y contadonan di cuenta cu ta participa e aña aki ya cu varios di nan ademas di conta storia ta trece poesia ritmico acompaña pa un instrumento. E presentacion ta tuma lugar na Cas di Cultura diamars dia 7 di november pa 6or y mey. Carchinan ta obtenibel na biblioteca na Playa y San Nicolas y na MFA Noord y Paradera pa solamente 5 florin.
