Diamars mainta Paul Croes a presenta na Korrektie Instituut Aruba (KIA) pa sinta su sentencia di tres aña di prizon. El a haci esaki den tur trankilidad, sin ningun fanfaria y sin a laga avisa ningun medio of amigonan. El a scoge esaki pa trankilidad di su famia y esunnan cerca di dje.
Su palabranan pa prensa prome cu el a bay paden tabata “Mi ta carga mi responsabilidad cu un mente y curason trankil. Como esun responsabel pa tur cos cu ta encera un ministerio di gobierno, ami ta esun cu mester carga e responsabilidad aki. E periodo aki mi lo uz’e pa enfoca riba cosnan positivo cu mi por saca for di e momento pisa aki den mi bida y yuda hobennan cu ta cay cera y yuda den duna les na esunnan cu lo desea esaki”, di acuerdo cu Paul Croes.
“Sigur e ta un situacion duro pa mi y mi famia. Momentonan dificil cu nos ta pasando aden pero cu un confiansa y energia positivo nos ta sali for di esaki tambe. Mi lo sali hopi mas fuerte di henter e situacion aki. No ta e ultimo cu boso lo scucha di Paul Croes” tabata su declaracion.
Paul Croes a ricibi e sentencia final di Cassatie di Corte Supremo (Hoge Raad) na Hulanda dia 7 di februari ultimo. Ministerio Publico a dun’e dia 21 di februari pa meld na KIA y esaki ta locual el a haci tambe. E sentencia final despues cu Ministerio Publico a pidi cinco aña di prizon p’e, a resulta den tres aña. Di esaki e lo mester sinta 2 aña den prizon.
Finalmente Caso IBIS a resulta un caso unda a acusa Paul Croes di a maluza 55.000 florin di su propio fundacion politico pa uzo personal. Algo cu Croes te na ultimo a keda bringa, pero no a logra convence ni fiscal, ni hues di Corte di Prome Instancia, ni tres hues den Corte Comun di Caribe Hulandes situa na Corsou y ni tampoco cinco hues den Corte Supremo na Hulanda.
Fuentenan cerca na e caso a informa prensa cu e team di defensa di Paul Croes ta evaluando pa inicia un proceso den Corte Europeo di Derechonan Humano pa e 86 dianan cu el a pasa den isolacion, algo inhustificabel pa e acusacionnan cu tabatin den su contra, durante inicio di e caso aki. Nan ta consider’e un abuso di marca mayor.
Paul Croes ta casa y tin un yiu homber y yiu muhe.
