Ta tempo pa nos aumenta nos confiansa den Señor. Ta tempo pa haci oracion sin stop, pasobra ta solamente Dios tin e ultimo palabra. Y ora oracion ta subi na cielo, bendicion lo baha na tera. Pasobra pa Dios nada ta imposibel, nos Dios nunca a perde un bataya y den Cristo Hesus nos ta mas cu vencedor.
Ta tempo pa laga tur cos den man di Señor, pasobra esey ta demostra confiansa den Dios. Aunke cu nos no ta mira Dios, nos sa cu E ta fuerte, firme y fiel. Ora nos laga tur cos den man di Dios, nos lo mira Dios su man den tur cos.
Pasobra Ami ta Señor bo Dios. Kende ta sostene bo man drechi.Kende ta bisabo, No tene miedo Ami lo yuda bo.( Isaias 41:13).
No tene miedo pasobra Mi ta cu bo, no desmaya, pasobra Mi ta bo Dios, lo Mi fortalece bo, si lo Mi yuda bo. Si lo Mi sostene bo cu e man drechi di husticia ( Isaias 41:10).
Señor kier splica nos bon cla den Zacarias 4: 6 bisando: No ta pa medio di forsa, ni pa medio di poder, ma pa medio di Mi Spirito, e Señor di ehercitonan ta bisa.
No ta pa medio di un ehercito, ni tampoco forsa fisico, pero pa medio di e Spirito di Dios.
Den e presencia di Dios murayanan lo cay y seronan lo move. Dios kier recorda su pueblo cu su poder ta infinito, solamente nos mester presenta tur nos oracionnan cu suplica y gradicimento y no ansha pa nada.
Mundo ta yen di ansha, preocupacion y stress, pero esunnan cu ta kere den Dios lo para firme sabiendo cu Dios ta cu nos.
Pa e motibo aki Bo ta grandi, Oh Señor Dios, pasobra no tin ningun manera Bo. Y no tin ningun Dios fuera di Bo. Conforme tur loke nos a tende cu nos horea (2 Samuel 7:22). Den Daniel capitulo 6 ta wordo demostra na nos cu Daniel tabata haci oracion tur momento y Daniel a sali victorioso, pasobra e rey mes a wordo convenci cu e Dios di Daniel ta e Dios berdadero (Daniel 6: 26+27).
Den ningun circunstancia Dios lo laga su pueblo bandona, y Dios a siña nos cu den tur momento nos por yega cerca di siguiente forma:
Si Mi pueblo, cu ta wordo yama na Mi nomber, humilia nan mes y haci oracion y busca Mi cara y bira for di nan mal camindanan, e ora ey lo Mi tende for di cielo,i lo Mi pordona nan pica y cura nan tera (2 Cronicanan 7:14).
Nos mester siña nos yiunan, cu den tur circunstancia Dios ta nos refugio y fortaleza, y prome cu recori na violencia, arma, pelea y hasta crimen, busca e cara di Dios, arepenti, confesa pica, pasobra Dios semper ta fiel y husto pa pordona.
Humilia boso mes anto bao di e man poderoso di Dios, pa E por halsa boso na e tempo apropia. Tirando boso preocupacion riba dj’E pasobra E ta percura pa boso (1 Pedro 5:6+7). Sea keto y sabi cu Ami ta Dios, lo Mi wordo halsa memey di e nacionnan, lo Mi wordo halsa riba tera. Señor di ehercitonan ta cu nos e Dios di Jacob ta nos refugio (Salmo 46:10+11).
Awe ta bon momento pa reconoce Dios den bo bida, y no sigui biba pa biba, pero duna honor y respet na esun cu por haci tur cos bira realidad den bo bida, ora abo tuma e decision di entrega bo bida na Cristo Hesus. Awe ta e dia di bo salbacion.
