Como mayor nos mester tene cuenta cu nos yiunan segun nan ta crece y wak pa lanta den seriedad y integridad, pasobra e tempo cu nos bibando aden si nos no pone atencion nos por lamenta. Tin 2 Mentalidad cu ta influencia nos hobennan y cu nos como mayor mester traha duro riba dje.
Prome ta e mentalidad di Palo di Kwihi (Na Corsou nan ta bisa palo di Indju). E palo di kwihi (Indju) ta crece grandi, sin direccion, su rama ta zwaai di links pa rechts y su rais ta superficial, e no ta bay hundo den tera y den temporada di awasero y biento fuerte e ta cay hopi facil.
Ta bon pa nos lanta nos yiunan no solamente fisicamente fuerte, pero tambe mentalmente, serio y integro. Esaki ta conta tanto pa mucha homber /mucha muhe. Un curpa bon forma fisicamente, ta conta awendia tanto pa homber y muhe. Pero no ta fisico so ta conta caracter ta hunga un gran rol, no ta estudio so ta conta, bon manera moral y respet ta sumamente necesario den nos bida diario. Pa un palo crece bon e mester wordo guia straight for di ora e ta chikito,e mester di sosten pa crece recht, mester cuid’e pa e tin un bon direccion y si tin di snoei, mester snoei y e miho momento pa snoei ta ora e palo ta jong, pasobra despues cu e palo crece desforma snoeimento ta bira dificil.
Mescos ta nos yiunan, for di chikito nan mester wordo coregi y guia riba bon caminda, nan mester come bon y drumi na tempo, nan no por wordo considera grandi prome cu nan tempo. Nan mester siña respeta nan mes y pa hende respeta nan. Nan mester tin bon manera y un caracter stabil, cual ta guia na seriedad y integridad. Un mucha asina ta lanta cu weso di lomba, e ta tuma decision bon pa su futuro y lo briya den su estudio. E lo no tin ningun relacion mediocre cu lo daña su futuro y den mayoria cos e ta consulta cu su mayornan. Pesey laga nos como mayor para fuerte contra e mentalidad di palo di kwihi, cual ta muchanan cu tin curpa grandi pero cabes bashi. Lesa Juan Capitulo 15 vers 2 pa bo sa cu ta boluntad di Dios pa lanta y coregi bo yiunan bon.
E di dos mentalidad ta esun di Tirakochi (Na Corsou nan ta bisa Dalakochi). Esaki ta un mentalidad cu ta solamente ora e mucha ta den un grupo e ta fuerte y ora e ta su so e no por alcansa su meta. Ora tirakochi ta hopi hunto e ta destructivo, pero ora e ta su so e ta un insecto cobarde cu ta entrega facilmente, bo ta yega pone bo man riba dje y cambie di luga. Den e mentalidad aki bo ta mira cu no tin seriedad, tin hopi cobardia y tambe flohera. Nos mester lanta nos yiunan cu weso di lomba pa enfrenta bida como un luchado, pa asina yega na e victoria cu nan ta merece den nan bida. Muchanan mester siña lucha pa bay dilanti tanto den estudio, deporte y despues na trabao pa bira homber y muhe di seriedad y integridad. Como mayor nos parti ta vital den nan crecemento.
Den un palabra no tene miedo di nada, pero enfrenta tur cos den nomber di Dios, sabiendo cu den Su nomber tin Poder. Tin demasiado mucha ta lanta sin conocemento di e palabra di Dios, cual ta pone cu hopi biaha nan ta tuma decision mediocre cu lo ta un obstaculo pa nan futuro. Y specialmente e asunto cu mucha ta cana den geng como bandido, ta daña mucha su futuro completamente . E mentalidad ariba menciona ta acepta droga, buracheria y otro cosnan facilmente. Pa motibo cu no tin caracter y weso di lomba pa rechasa locual cu ta malo. E mentalidad aki ta gusta murmura y balota y asina drenta den un curpa di flohera cu no ta gusta tuma curashi, pero ta prefera di keda bisa tur dia mi no por. Beibel ta papia di dje den buki di Numbernan Capitulo 11 vers 30.
Laga nos como Mayor, lanta’riba y tuma curashi, pa guia nos yiunan den bon caminda di seriedad y integridad. Bendicion!
