Ta tempo pa tur hende fortalece nan compromiso cu Dios y stop di busca forsa temporal den e mundo. Stop di busca ken ta like bo of no. Pero stabilisa bo contacto cu Dios diariamente.
Si bo no haci esaki lo bo haya bo ta busca cosnan cu por imita, pero cu no ta berdadero. Cuanto hende ta den idolatria y ta adora Dios falso. Pero toch no kier tin un relacion cu Dios Todopoderoso.
Cuanto hende sa masha bon, cu Dios ta Todopoderoso, fiel y berdadero, pero nan ta perde nan tempo den bruheria etc. etc.
Hopi hende ta drenta un relacion sin ningun clase di futuro, pero cu solamente ta complace carni y despues nan mes ta lamenta di nan bobedad.
Dios kier pa nos stabilisa nos confiansa den dje pa nos no biba den duda. Pero biba cu fe den Dios, pasobra sin fe ta imposibel agrada Dios.
Nos ta bibando den un tempo cu materialismo y tecnologia ta haci tur locual ta posibel, p’asina demostra nan poder y pa domina mundo. Y hende ta pone nan confiansa den esey y nan ta haci manera cu Dios no t’ey.
Pero ay di esunnan cu ta bandona Dios pa cos y no ta corda kico Dios a haci pa nan cu ta depende riba man di hende enbes di stabilisa nan compromiso cu Dios.
Con bo ta stabilisa cu compromiso cu Dios?
Arepenti di tur locual cu ta pica den bo bida. Entrega bo mes na Dios. Pone Señor na prome luga den bo bida y den bo hogar. Pordona bo ruman. Pordona bo esposa(o) y bo yiunan. Halsa oracion y alabansa na Dios y biba den santidad.
Ta facil pa bo tin hopi amistad, hopi hende rond di bo, pero den tur esey bo no tin e locual ta mas importante, cu ta e presencia di Dios.
Y e presencia di Dios lo no t’ey caminda tin orguyo, envidia, rabia, odio, amargura, bibando den pasado di bo mes y di otro, falta di pordon etc. Bo tin cu mata e carni pa e presencia di Dios por reina den bo bida. Wak bon cu ken bo ta asocia y cual ambiente bo ta gusta.
Ora mayor su compromiso cu Dios ta stabiel e ta nota den e forma cu nan ta lanta nan yiunan y e comportacion di e yiunan. Ora mayor no tin compromiso cu Dios nan ta laga e yiunan haci manera nan kier, pasobra e mayornan no tin temor di Dios.
Den Job capitulo 22:21 -30 ta bisa lo siguiente: “Entrega awo y keda na paz cu Dios, pa fabor acepta instruccion for di su boca y warda su palabra nan den bo curason.
Lo bo haci oracion na dje y E lo scucha bo y lo bo cumpli cu bo promesanan. Tambe lo bo declara algo y esey lo ta estableci pa bo y luz lo briya riba bo caminda. Tur esaki y hopi mas lo bo ricibi ora bo stabilisa bo compromiso cu Dios.
