Aña 2023 ta den porta y situacion mundial ta tenso. Tur cos ta mustra cu nos ta paralelo cu e dianan den tempo di Noe. Segun Genesis 6:5 ta para skirbi: E ora ey Señor a mira cu maldad di hende tabata grandi riba tera, y cu tur intencion di pensamento di hende su curason tabata continuamente maldad so.
Si nos wak rond di nos, nos ta mira maldad y aumento di maldad. En bes cu hende somete na Dios, hende ta resisti contra Dios, contra Su palabra y contra Su principionan.
Amor, confiansa, fieldad y lealtad ta birando scars. Pasobra e influencia di maldad, amor pa placa y poder ta pone hende rechasa Dios y caba cu otro.
Nos ta mirando tur locual cu Hesus a bisa den Mateo capitulo 24 ta tumando luga, pero Hesus mes a bisa cu esey lo no ta e fin. Al contrario nos ta para na principio di dolornan (Mateo 24:4-12).
Hasta awor ta mal influencia e muchanan pa asina daña nan mente Pa asina den e futuro cercano ta dificil pa bo haya un mucha cu tin pensamento sano y deseo di biba pa Señor.
E encargo di mayor cada dia ta bira mas pisa, pasobra no solamente costo di bida a bira caro. Pero e cuido di nos yiunan ta exigi tempo y hende responsabel no por ta mandando app henter siman pa nan yiu en bes di papia personal cu ne.
Nos ta bibando den un tempo manera Sodoma y Gommora, pasobra respet y dignidad a mengua formalmente. Si abo mes no mantene bo disciplina y dominio propio e maldad di mundo ta hala bo bay cu ne.
Tentacion y maldad ta bin lora den papel di regalo, inmoralidad ya no ta sconde mas den scuridad, pero e ta actua den dia cla, pasobra hende a perde temor pa Dios.
Dios a manda su unico Yiu pa ken cu kere den dj’E no bay perdi ma haya bida eterna, y e unico opcion ey ta habri pa tur esunnan cu kier kere den Cristo Hesus.
Pero materialismo y libertinahe a pone hende kere cu nan por biba manera cu nan kier, y ta domina bida di hopi hende.
Dios ta spierta pa hende no ta gaña, pero hende no ta haci caso. Dios ta hasta menciona cual ta esunnan cu lo no mira su cara (Galationan 5:19-21 y 1 Corintionan 6:9+10).
Tin un wega di diabel ta bay rond cu ningun hende no ta perfecto, esey ta locual diabel ta yena cabes di hende cu ne pasobra Dios nunca a bisa asina: Mateo 5:48 ta para skirbi: P’esey boso mester ta perfecto mescos cu boso Tata celestial ta perfecto. ( Filipensenan 3:12 tambe ta confirma esey).
Santiago 4:17 ta bisa: P’esey esun cu sa di haci bon, y no ta hacie, pa e esaki ta pica.
Laga nos uza e excuus cu nos no ta perfecto, pa asina sigui biba den inmoralidad, malicia y scuridad.(Romanonan 6:11-14).
Hebreonan 12:14 ta para skirbi: Aspira pa tin pas cu tur hende, y santificacion, sin cual ningun hende lo mira Señor. Aki nos por mira claramente ki tipo di hende nos mester ta pa nos por drenta reino di Dios. Pasobra Dios no ta baha su standard, pa complace cu hende.
Lucas 21:36 ta para skirbi: Ma sea alerta tur ora bay, haciendo oracion pa boso por tin forsa,pa scapa di tur e cosnan aki, cu ta bay tuma luga y para dilanti di e Yiu di hende.
Nos tur mester arepenti di nos picanan. Laga nos dobla nos rudia, y pidi Dios yudansa.
