Como mayor nos mester ta hopi alerta den e tempo aki pa asina nos por evita nos yiunan cay den trampa di e enemigo. Ningun mayor por ta 24/7 hunto cu nan yiunan, pero tur momento bo haya un chens instrui bo yiu riba e caminda corecto.
Specialmente despues di un divorcio bo ta haya cu e tata a bay for di cas y e yiunan ta falta di atencion, di tata, pero ora bo ta un tata serio aunke divorcio a presenta. Por fabor no laga bo yiunan bandona. Haci tur locual ta posibel pa bo ta den contacto cu nan, pasobra nan mester di bo.
Pero hobennan, boso tambe tin cu pone boso cabes na pareu. Boso no por coy mundo c’un man. Pone di boso parti y obedece ora boso mayornan papia cu boso. (Efesios 6:1-2)
Den 2 Timoteo Capitulo 3 Pablo ta skirbi y ta a menciona tur e peligernan, tanto hende peligroso, como situacion di peliger.
Den 2 Timoteo 3:10 Pablo ta bisa: “Ma abo sigui mi enseñansa, conducta, fe, pasenshi, amor, perseverancia.
Na prome luga Pablo ta bisa: “sigui locual cu mi a siña bo, cu ta locual ta bon pa bo y e prome cos cu e ta menciona ta conducta. Mal conducta y actitud robes ta cera tur porta.”
No imita maldad. Aleha fo’i maldad. Tin hopi cos bon pa haci pa muchanan jong ta ocupa nan mes cu maldad. Antes tabatin un excuus cu ta falta deporte. Pero awo nos tur ta mira cu no ta deporte ta influencia di maldad, pasobra un mucha cu berdaderamente kier haci deporte ta busca deporte p’e haci y ta afilia su mes na un club, soporta disciplina pa asina e por bira un deportista profesional.
Pero e asunto di kere cu bo ta gangster, esey ta e cos di mas bobo, cu un persona por hinca den su cabes, bo mama no a haya ningun yiu gangster.
Tur hoben mester tin Fe den Dios. Y esey ta depende hopi di nan mayornan su guia, cual ta un mandato di Dios .(Efesios 6:4)
Ora un hoben lanta den e palabra di Dios e ta haya pasenshi cual ta un fruta di Spirito Santo, sin pasenshi no tin dominio propio y e hoben lo cuminsa haci cosnan prome cu tempo. Esey por trece consecuencia hopi serio.
Amor un hoben mester hay’e for di su mayornan, pa asina e por ta un persona cu ta stima hende y trata hende bon. Si un hoben lanta den un cas cu violencia e tin hopi chens di bira violento.
Un hoben mester persevera, pasobra si e no ta persevera e no ta caba scol, ni tampoco lo tin un trabao, lo e lanta un mucha floho, sin proposito den bida.
Nos ta bolbe bek na mesun caminda, cual ta cerca e mayornan pasobra e trabao di mayor ta grandi y e ta necesario den bida di cada hoben.
