Manera ya ta conoci, 24ora su portanan semper ta habri pa un y tur den comunidad por vocifera nan preocupacion. Recientemente e mayornan di Jaynah Jimenez Rodriguez a acerca nos pa asina splica tocante e situacion actual di e mucha muhe aki di apenas 9 aña di edad. E mama Jackseny Kock a conta cu Jaynah ta padece di un paralisis celebral y cu ta for di 2017 tanto e mama como tata, Jhonatan Jimenez, a muda hunto cu Jaynah pa Hulanda.
Asina e mama a sigui conta cu a pesar di su limitacion, Jaynah ta un mucha hopi alegre y nada ta strob’e di sigui purba bay dilanti. Sinembargo, actualmente nan ta confrontando un situacion un poco fastioso cu Jaynah debi na un desviacion cu e dokternan a constata na su lomba. Na Hulanda e ta ricibi terapia na scol tur dia pa asina purba ‘pak aan’ su limitacion fisico. Den e transcurso di esaki, Jaynah a cuminsa sufri di epilepsia tambe, pues a bira dificil pa e drumi trankil y a dificulta e proceso di transport’e.
E desviacion na su lomba ta, segun e dokternan, principio di scoliosis.
Den cuadro di tur esaki, e mayornan ta buscando un solucion pa asina transporta Jaynah den un manera mas eficiente y sigur p’e mes. Pues awo e lo mester bay haci uzo di un rolstoel mucho mas grandi y awo mester busca un ‘rolstoel bus’ special pa por transporta Jaynah. Awo mester cumpra un bus nobo y hiba esaki pa haci adaptacion pa mira si gemeente ta cubri e gastonan aki.
Pa esaki, e mayornan di Jaynah ta buscando ayudo for di e comunidad di Aruba pa nan por logra cumpra e bus pa por transporta nan yiu cu mas comodidad y siguridad posibel.
Si tin cualkier persona cu kier yuda e mayornan y Jaynah yega na e transporte cu tanto e tin mester di dje, por tuma contacto na e number di telefon aki +31 685672251 y si ta desea di aporta cu algo, por subi e pagina di gofundme: https://gofund.me/15b87ba8
Pa cobertura mas amplio lesa edicion di TREMPAN mañan.
