E palabra di Dios ta fiel y berdadero, den Genesis Capitulo 18:19 , Dios a scoge Abraham pa e por ordena su yiunan y hendenan di su cas despues di dje, pa warda e caminda di Señor , door di haci husticia y huicio, pa Señor por trece riba Abraham locual Señor a papia tocante di dje.
Prome cos cu Señor ta bisa ta pa e ordena su yiunan, esey ta pa e siña su yiunan ordo , moral y respet pa cana den e caminda di Dios, mescos cu Dios a ordena Abraham.
Y awe den Efesios Capitulo 6 ver 1-4 e palabra di Dios ta siña nos mesun cos.
Un tata ta yama pa Dios pa cuida y ordena su cas manera Dios ta stipula, un tata no tin derech’i manipula, ni tampoco abusa di su famia. E tata su deber ta di percura pa tin cuminda na mesa, haci tur locual ta posibel pa yega na un cas pa su famia y den e cas laga Dios goberna, p’asina e bendicion di Dios ta constantemente den e cas.
Tur hende kier ta financieramente stabiel, pero tempo cu dia a siña nos cu finansa, no ta tur cos. Cuanto famia cu ta bon para financieramente, toch ta kibra social, dividi, divorcia y mas cruel ainda nan ta rechasa otro.
Pero otro banda bo ta haya un famia cu tur luna ta lucha pa keda cla cu nan necesidad, pero toch tin un amor inmenso den e famia.
Ora abo como tata reconoce cu no ta djis Dios a pone bo den un cas, Dios a scoge bo pa bo ta un bon tata, pasobra nos tur sa cu aki riba mundo, tin hopi trahado di yiu, pero poco tata.
Y awor tur hende ta mira e necesidad di tata riba nos isla, pasobra bo por tin e placa, e cas, e auto, e negoshi, pero tin algo cu ta falta, ta e tempo y e amor pa bo famia.
Pa falta di e tempo y e amor y dedicacion na famia, nos tin hopi mucha ta cana, sin direccion y hasta nos por bisa cu esey ta motibo cu hopi mucha ta trompica.
Como mayor bo ta scogi pa Dios, pa bo tuma e autoridad cu Dios a duna bo pa lanta bo yiu den bon caminda.
E palabra autoridad ta nifica cu bo tin derech’i disciplina y coregi, pero no di maltrata.
E curason di e tata mester bolbe bek pa e yiu (Malaqias 4:6) y p’asina e curason di e yiu bolbe bek na e tata, pasobra Dios ta yama mayor pa nan ta responsabel pa nan yiunan.
Ora un mayor tin temor di Dios y ta responsabel, e ta bendiciona, pasobra Salmo 128:1-4 ta confirma esey na nos y e ta mustra con bo esposa y bo yiunan y hasta bo nieto lo ta.
Un yamada na tur mayor, sea bo ta tata legitimo (biologico) of ta di criansa, cumpli cu e mandato di Dios, p’asina tambe cumpli cu comunidad, door di lanta yiunan decente.
