Rey di tur Rey y Señor di tur Señor esey ta su nomber, kende ta biba pa semper. nos Salbador t’esun cu nos tur por depende riba dj’E.
Cristo Hesus t’e cambiado di bida, El a saca nos for di scuridad y trece nos na luz, el a paga pa nos picanan riba e cruz aya na Golgota.
Hopi awendia no ta reconoce cuanto El a sufri pa nos, hopi no ta stim’e manera El a stima nos, pero esey no ta kita nada for di e obra maraviyoso cu Hesus a haci pa nos,
Laga tin den boso e actitud aki, cu tabatin tambe den Cristo Hesus. Kende aunke E tabata existi den e forma di Dios, no a considera igualdad algo pa tene na dje.
Ma a bandona Su mes Gloria, tumando forma di un sirbido, siendo traha den e semehansa di hende. Y hayando Su mes den condicion di hende, El a humiya Su mes door di bira obedecido te na morto, esta morto na un cruz. (Filipensenan 2:6+7+8).
El a stima nos tempo nos tabata perdi den nos picanan. P’esey Hesus a bisa: Bin cerca mi tur cu ta cansa y carga y lo mi duna boso descanso.
Den Su amor no tin discriminacion, no tin rechaso, pero tin oportunidad pa tur esunnan cu arepenti yega na bida eterna, pasobra Cristo Hesus t’e caminda di berdad y bida.
No tin nada mas importante den nos bida, ora nos ta plenamente convenci di e existencia di Dios den nos bida, ora nos por comtempla Su grandesa, con Dios a traha nos segun su imagen y semehansa, pa nos por bay goberna y multiplica riba e mundo.
Pero tambe Dios, ta conciente cu e mundo tin mester di un Salbador, e mundo mester di un Redentor, p’esey el a manda Su Yiu unigenito,pa ken cu kere den dj’E no bay perdi ma tin bida eterna. (Juan 3:16).
Esaki t’e oportunidad pa salbacion cu nos tur mester gara na dje, pasobra esun cu tin e Yiu tin e Tata.
Awendia tur hende cu tin conocemento kier bende nan conocemento mas caro posibel, kier negocia cu nan conocemento, pero nos Rey Cristo Hesus a duna na nos tur oportunidad pa conoce, sin cobra nada a cambio y a duna nos un conocemento y autoridad den su nomber, cual nada na mundo no por wordo compara cune.
Den Su sufrimento ningun hende a wordo lubida, pasobra E ta reconoce, como esun cu a carga tur nos picanan riba dje.
P’esey e palabra di Dios ta bisa: Pesey Dios a hals’E te na e halturanan, y a dun’E nomber riba tur nomber, cu p’e nomber di Hesus tur rudia mester dobla, di esunnan cu ta den cielo, y riba tera, bao di tera, y cu tur lenga mester confesa cu Hesus Cristo ta Senjor, p’e gloria di Dios Tata.
Laga nos tur reflexiona awe, riba Su grandesa su amor grandi cu ta surpasa tur amor terenal, Su Misericordia y su compasion, cual cu no tin ningun pa compara cu ne.
Awe ta un dia pa pordona otro, y reconcilia cu otro den tur forma, pasobra Cristo a reconcilia nos cu Dios pa medio di Su morto na crus.(2 Corintionan 5:19).
Pasobra mi no tin berguensa di e Evangelio, pasobra esaki ta poder di Dios pa salbacion pa tur cu ta kere.
Cristo Hesus ta y ta keda Rey di tur Rey y Señor di tur Señor pa semper, y semper y den tur eternidad.
