Pastoor Jairo y Pader Jose Nava y hunto cu Conseho Parokia Pastoral ta participa cu lo bini cambio di orario di misa den Parokia Inmaculada Concepcion na Santa Cruz. Cuminsando diadomingo 2 di februari e orario di misa ta cambia.
E cambio lo ta siguiente. Diadomingo e misa Mayor lo ta 8’or y pa 10’or di mainta na Spaño y atardi 6:30. Esey kiermen cu misa 6:30 y 9’or di mainta ta cay afo y ta pasa pa e orario nobo. Solamente e misa di atardi diadomingo ta conserva su ora manera custumber.
Posiblemente despues di misa di 8’or di mainta lo por ofrece na porta di misa un koffie, asina e sacerdotenan por comparti un rato cu e parokianonan. Ariba dialuna lo ta un dia di descanso pa e sacerdotenan, esey kiermen cu lo no tin celebracion eucaristico dialuna, pero si mester haci entiero esey ta posibel. Orario di kantoor si ta keda normal, di dialuna pa diabierna di 5 PM te cu 6:30 PM. E kantoor di Santana ta habri Dialuna Diaranson y Diahuebs di 5 PM te cu 6 PM. Tambe ta participa cu ya tin fechanan di Bautismo pa aña 2020 estableci sin posibilidad pa cambia esaki. Pronto lo anuncia tambe fecha di inscripcion pa confirmacion.
Parokia Inmaculada Concepcion ta sigui ofrece misa na TV cual te awor ta Tele Aruba y Diario TV, ariba Youtube: Dia Di Senjor. Facebook Page: Parokia Inmaculada Concepcion Aruba. y posiblemente e misa na Spaño lo ser transmiti den futuro ariba TELE JESUS INTERNACIONAL DI NEW JERSEY.U.S.A
Parokia Inmaculada Concepcion tambe lo bay ofrece celebracion Eucaristico na Spaño, tumando nota cu tin hopi hende di e comunidad Latino residencia tambe ariba Aruba. Pero e ta habri pa tur cu kier bini misa e ora ey. Iglesia como Mama tambe ta habri porta pa nan y yama nan bon bini. Parokia di Dakota ya pa basta aña a habri porta pa e comunidad aki, cual a haya su forma di e miho manera.
Dicon un misa na otro idioma? Pa cuminsa na Parokia di Noord tin misa na Ingles, na Dakota na Spaño cual ta bon bishita y Inmaculada Concepcion tambe tin e posibilidad di ofrece esaki ya cu ambos sacerdote cu ta aki ta domina e idioma Spaño. “Na mes tempo y prome cu tur cos e Palabra di Dios mester anima nos pa habri porta pa tur hende di bon boluntad y na cada hende cu nos atende, ta Hesus mes nos ta atende. Nos ta lesa den Mateo 25, 35. 43 “Mi tawata extranhero boso a ricibimi”. Y Papa Francisco den su jornada mundial di refugiadonan y Migrantenan ta bisa nos “ Cu cada forastero of stranhero cu yama na nos porta ta un ocasion di un encuentro cu Hesu-Cristo mes cu ta identifica su mes den e hende, sea cu e ta keda ricibi of rechasa. Na cada hende cu ta bandona su patria pa un miho situacion di bida, Señor mes ta confie na e amor maternal di Iglesia y finalmente tambe ta un gran responsabilidad di Iglesia pa e comparti cu tur hende di bon boluntad sin mira di unda e ta bini.”
Den mes un rosea Pastoor Jairo y Pader Jose ta participa cu e parokia awor despues di tres aña cu nan t’ey ta conta cu un Conseho Pastoral Parokial solido, cual nan ta apoyando di forma incondicional y tur decisionnan ta ser consulta cu nan tambe, pa asina e Parokia aki ta bira un cu ta habri pa tur hende.
