Cada colega cu mi papia cu ne, sin excepcion, ta contento cu Altocomisario Ramon Arnhem. Di chikito te grandi, di studiante te pensionado, hasta detenido a expresa cu Arnhem ta haciendo un bon trabou. Durante celebracion di Dia di Cuerpo Policial na Misa Sagrado Curason, tambe coleganan presente ta papia di su humanidad, humildad y liderazgo. Trabounan interno tin hopi, entre otro, pa organisacion di korps, training pa personal y specialmente e “rechtspositie” cu coleganan merece. Mi a compronde cu pronto Korpschef lo duna un presentacion di su maneho y/of plan na Parlamento di Aruba.
Un bon speech di e Minister di Husticia Rocco Tjon, tocante e lema di KPA cu ta siguridad, integridad y servicio. Palabra cu mester ta central den cada departamento di Husticia. Palabra sigur emocional y di inspiracion di nos Altocomisario cu a cumpli un aña den su funcion.
Arnhem ta sinti su mes bon ricibi y bonbini aki na Aruba. Mirando e bon trabou cu e ta eherce, sigur e bonbini ey ta bon mereci. E parti culminante di e mainta na Misa tabata pa ricibi e bendicion pa Cuerpo Policial Aruba, e coleganan polis y colega administrativo cu ta brinda servicio na pueblo. Reto sigur tin, pero bendiciona nos ta.
Aruba te ainda tin di mas violencia, di mas arma y di mas droga. Cada caso ta un di mas, ta un cu nos no mester acepta, ta un cu mester a evita di pasa. Ta bon si pa nos realisa tambe cu internacionalmente Aruba ta wordo reconoci pa e siguridad cu nos ta brinda, e motibo number un dicon turistanan ta bishita nos isla. E nivel di siguridad cu tin, ta danki na comportacion di nos hendenan y sigur danki na esfuerso di Cuerpo Policial Aruba y tur “stakeholder” den veld di siguridad. Nos mester cuida e bentaha precioso cu aki nos tin, cu tur herment cu nos tin.
Masha pabien na Cuerpo Policial Aruba, pabien na nos Altocomisario Ramon Arnhem.
