ELMAR su persona sigur ta participa den diferente curso pa mantene nan conocemento na halto y atende cu diferente tipo di storing, Pero cada un ta diferente y e no ta di tal forma cu ta sosode tur dia pa cual e trahadonan ta perde e habilidad riba cada problema. Esaki ta loke cu Tico Koolman, Director di operacion N.V. ELMAR, a splica den conferencia di prensa di e compania diaranson mainta.
Por ehempel, pa loke ta e proyecto 60 mil volt, no ta algo cu ta sosode tur aña. Mas bien un bes den tanto tempo. Di otro banda, trabou di 12 mil volt ta tuma luga tur dia. Ora cu yega tempo pa traha riba algo di 60 mil volt no ta corda mucho mas di kico tur cos e trabou ta encera.
Pa e motibo ariba menciona, ta entrena e hendenan cu si algo mester pasa, pa e reaccion ta hopi rapido, y limita e daño mas tanto posibel, cu ayudo di e mecanico cu ta estableci na Hulanda.
Den e situacion cu a surgi aworaki, cu e mecanico ta na Aruba, ta pone mas cu un trahado traha banda di dje pa siña loke mester haci. Aunke nan ta certifica solamente den 12 mil volt, nan tin e parti di entrenamento di prome linea cu e 60 mil volt.
E problema cu e kabel di 60 mil volts no ta algo cu ELMAR mes por a drecha. Simplemente pasobra e compania ta certifica y tin empleadonan cu a sigui diferente curso pero den 12 mil volts. Solamente por reacciona riba un problema, tumando decisionnan temporal pero mester spera riba mecanico di Hulanda pa atende cu e problema mes.
E mecanico tabata pendiente pa bini Aruba, pero cu e accidente mester a adelanta su biahe y pone e kabel mas lihe posibel den servicio. E situacion actual ta cu tin dos traffor for di servicio y pa por sigui riba e proyecto mester, e dosnan (Sabana Blanco y Paardenbaai) aki mester ta den funcion.
