Samira Rafaela, cu recientemente a bira Parlamentario pa Partido D66 den Parlamento Europeo cu voto preferencial, ta di bishita na Aruba e siman aki. El a topa cu miembronan di Parlamento y cu Conseho di Minister di Aruba pa hunto explora posibilidadnan di proyectonan cu fondonan Europeo pa nos isla. Probechando su bishita riba nos isla, el a pasa tambe na proyectonan existente cu tabata posibel danki na Union Europeo.
POSIBILIDADNAN PA ARUBA
Samira Rafaela a splica cu e ta mira hopi posibilidad pa Aruba atraves di proyectonan cu ta enfoca riba tecnologia y innovacion. Na mes momento tin posibilidad tambe riba tereno di economia y deporte. Hunto cu Eddy Paris e ta trahando caba pa haci’e posibel pa Aruba haya mas acceso na proyectonan chikito y grandi pa deporte y empleo pa hobennan di menos recurso.
ASISTENCIA DEN CUADRO DI SITUACION VENEZUELA
Pa loke ta e situacion di Venezuela Parlamentario Rafaela a entrega un mocion den Parlamento Europeo pa atraves di fondo, na un forma structura, brinda ayudo na e islanan den Reino, pa mitiga e efectonan cu e islanan ta experencia debi na e situacion di Venezuela. Samira Rafaela a haya contesta caba riba su peticion y actualmente tin un analisis andando con e ayudo aki por wordo brinda na un miho forma. Intercambio di plannan entre gobierno di Aruba y Hulanda ta esencial den esaki.
PA CONCLUI
Samira Rafaela tin dos cartera den cuadro di su trabounan cual ta asuntonan social y asuntonan di empleo bou hobennan. Den cuadro di esaki e ta haci hopi esfuerso pa stimula democracia bou hobennan y lo explora posibilidadnan pa atraves di Union Europeo haya fondo pa realisa e proyecto di “ProDemos”.
Parlamentarionan di Aruba tin contacto regularmente cu Samira Rafaela riba topiconan di interes comun den Reino. “Nos ta orguyoso cu Samira Rafaela su intencionnan honesto pa yuda nos surpasa e retonan cu nos ta wordo confronta cune”, asina Rocco Tjon (MEP) a bisa den un relato na prensa awe.
