Seis grupo di Carnaval a subi e cayanan di San Nicolas y duna nan miho presentacion na tur mirones. Un parada cu a cuminsa den un solo cayente y a termina den anochi.
Darren van Ommeren, presidente di SMAC, a bisa di ta contento cu e parada a sali na ora. Total tabatin seis grupo bon presenta y alabes e last lap acompaña pa YX3M. “E temporada tabatin su retonan”, van Ommeren a comenta. Sinembargo, e ta haya cu e parada a bay bon y hunto cu su team a maneha e Carnaval. SMAC a zorg pa Carnaval no tabata falta nada.
Por mira atras na un bon produccion di eleccion di reina como tambe e eleccion di prins cu pancho. Tin algun cos cu nan lo mehora pa e siguiente aña pero por conta cu e temporada aki a bay bon pa SMAC. Falta djis un parada mas y SMAC lo traha nan rapport. “E aceptacion tabata bon”, el a finalisa bisando.
Mark-Benson Denz, director di 24ora.com, tabata presente den parada conhuntamente cu X FM. A combina ambos media p’asina habri parada.
Reina Hubenil di nos Carnaval, Jennely Winklaar, tambe a gosa di e parada na San Nicolas. Jennely ta spera cu tur persona por gosa di nos Carnaval di un manera sano.
Lienchie Merryweather, lider di Champagne Carnival Group, tabata satisfecho cu locual nan a logra presenta riba caminda. Champagne tabata basta grandi duranta Carnaval 69, nan tabatin mas cu 500 participante. Un total di ocho seccion a forma parti di Champagne Carnival Group.
Liliana Rasmijn, vocero suplente di Cuerpo Policial, a informa cu e parada a sali 12:00 exacto y mester a caba pa 6:40 pm. Na momento di e entrevista ya caba tabatin varios detencion. Cuerpo Policial tabatin un total di 200 trahado riba caya.
Minister Ursell Arends tambe a gosa di parada na San Nicolas. Semper el a gusta Carnaval mirando cu e ta parti di nos cultura y ta bon pa disfrut’e. Su conseho pa comunidad ta pa disfruta di Carnaval di un manera sano. Si tur cos ta bon, minister ta spera di ta den parada e siguiente celebracion di Carnaval.
Ex-Minister Chris Romero no ta un cara desconoci den e paradanan di Carnaval. Tur aña por mir’e den dje y e aña ‘ki no tabata un excepcion. El a disfruta locual Aruba tin di ofrec’e. “Otro aña ta esun mes mes”, tabata Romero su comentario.
“Solo cayente pero dushi ambiente”, tabata e prome comentario di Lisette Chung, lider di TOB. Su grupo a sali den grandi riba caminda cu 11 seccion. Su intencion tabata pa hacie chikito pero e grupo a keda crece yena cu luho.
Harold Pereira, lider di Los Laga Bai, a duna di conoce cu e grupo ta cumpliendo 40 aña pero nan lo celebr’e den grandi durante Carnaval 70. Los Laga Bai a conta cu un total di 350 participante den parada. Semper ta purba mantene entre 350 cu 400 pa por mantene bon ambiente y duna bon servicio. Pa mas cu binti aña Robert y Su Solo Banda ta anima e participantenan di Los Laga Bai.
Roland Croes, director di Setar N.V., tin por lo menos 28 aña participando den Los Laga Bai y keto bay e ta “tremendo ainda”. Croes ta participa den Carnaval desde cu e tabatin 17 aña di edad.
QueenAnne Bergen, lider di Empire Carnival Group tabatin 350 participante den su grupo. Bergen a comenta cu Empire ta un grupo cu cada aña ta crece pues e ta satisfecho. Empire ta existi oficialmente pa 7 aña caba.
Jerrino “Baas” Ridderstap ta lider di e banda musical DLS cu ta compaña Infinity Carnival Group. Ridderstap a comenta cu nan no t’un grupo grandi pero asina mes a logra pone algo bunita riba caminata. E grupo ta existi pa 5 aña caba, pa Carnaval 70 nan lo bin mas grandi y mas bunita. E grupo a conta cu alrededor di 300 participante.
Mayoria comentario riba red social ta gaba e parada masha. Hopi ta opina cu Carnaval na San Nicolas ta mas dushi y cu mas ambiente, probablemente pa falta di trailer banda di caminda. Tur hende ta yega, disfruta di e parada y despues bay cas.
