E tabata un situacion poco straño. Mientras cu polis tabata atende cu un asistencia dilanti di CITGO na Sasaki, a scucha grito na e gasolin station. No a pens’e dos biaha y a bay kico ta e situacion.
Ey ta caminda cu a bin topa tres tipo ta discuti. Dos di nan ta hunto y a paga e doño di auto pa nan bay dal un trip y bolbe cas. Nan a subi na San Nicolas, dal un buelta pabou y tabata cla pa bay bek pariba. Ey ta caminda cu cos a tranca. E duo a paga e chauffeur solamente dies florin pa e buelta, cual pa e chauffeur ta mucho tiki.
A start un discusion formal, caminda cu e chauffeur kier a keda cu e speaker y telefon di un di e amigonan. Polis a intermedia y a purba soluciona e problema. Nan a bay halto cu otro, pero na final e duo a corda cu nan ta leu fo’i cas y ta den e mesun auto cu nan a bin abou, nan lo tin di bay cas bek. Despues di intermedia basta largo, nan a logra cera paz y sigui nan caminda bek pa San Nicolas.
