Diasabra anochi exactamente 8:00pm a saca e parada di luz for di Aruba Entertainment Center. Polis ta premira cu pa 12:15am e cabes lo yega ex-DOW, unda e parada lo termina. Tin un total di 10 grupo participando den e parada di luz.
For di SMAC ainda no a menciona cuanto participante tin e aña aki y ni un comparacion cu e otro añanan. Polis a menciona cu e velocidad cu lo guia e parada ta den man di SMAC. A stipula adelanta unda e parada mester ta durante cada ora di e trayecto.
Pa loke ta orden publico, esey si ta resorta bou di Cuerpo Policial. Vocero di Polis a sigura cu tin 140 Polis uniforma riba pia pa guia e parada y mantene ordo. Riba dje tin tur e otro ekiponan cu ta sostene trabou di e Polisnan uniforma.
