Hopi hende a keda sorprendi pa e filanan largo cu por a mira principalmente na PriceSmart y Save More, di personanan en busca di materialnan desinfectante.
Mary Dijkhoff a splica cu e ta prepara pasobra e no sa con e situacion lo bay ta, ki luganan lo cera y ta prefera di ta prepara. Nan a cumpra hopi cos na paki pero saco di aros ta limita na dos pa persona. “Un rato mes mi a haya dolor di cabes di tanto hende aki den,” el a bisa.
Cecilia Meran a bisa di su banda a bisa “esaki ta parce un ciclon”. E mes a bay pa cumpra aros y mester a cumpra pa su bisiñanan, pero no por a hacie door cu tin limitacion. E señora tin hopi speransa cu e coronavirus no ta yega Aruba “pasobra esaki ta un pais hopi cayente. Nan ta bisa cu e ta biba mas den zonanan friu.”
Jacky Lopez tambe tabata haciendo compras na PriceSmart y a keda sorprendi pa e cantidad di personanan eynan. E ta kere cu tin hopi cos mas por pasa, y e hendenan tin mas chens pa haya e “flu” (griep) of algo pio, cu e coronavirus. “Keda disfruta.”
Hopi hende ta actua den forma preventivo. Orlando Pacheco a recorda cu Aruba ta un isla hopi chikito y si yega momento cu cera e transporte pa Aruba, nada no ta bay drenta. “P’esey nos mester ta prepara. Mi ta recomenda hendenan pa cumpra cosnan cu no ta daña. Nos ta laga tur cos den mannan di Dios,” el a bisa.
Claire di su banda a bisa cu e no tin miedo y ta haci loke e hendenan (expertonan) te recomenda, esta pa lama man tur ora. Loke el a constata cu toilet paper a caba y desinfectantenan ta bay hopi lihe.
Tin ciudadano ta kere cu mester spera y warda kico ta bini Aruba. Lio Davelaar ta pensa cu e coronavirus por yega Aruba, pero mientrastanto mester ta trankil. E mes a bin haci compras y a spanta ora cu el a mira hopi hende. Hasta el a pensa cu ta Gobierno a paga dos biaha.
Jane Werleman no a cumpra mucho cos extra. Mas bien tabata compra normal cu excepcion di e clorox pa haci e luganan miho limpi unda cu mannan ta yega hopi. E hecho cu coronavirus a yega Corsou, ta pone cu e tin mas chens pa yega Aruba, segun e ta pensa. E ta bisa si cu ta hopi importante pa sigui regla y consehonan cu Departamento di Salubridad Publico ta duna pa evita plamamento di e virus. Aunke nan ta bisa cu e no ta keda hopi den cayente, mester trata di preveni, esta laba man hopi.
