Pa e temporada halto, esta ‘winter’ 2023-2024, e aerolinea JetBlue ta proyecta cu capacidad di asiento lo subi di seis vuelo diario pa nuebe vuelo pa dia. Na tur ta pappia aki di 63.000 asiento adicional. Esaki ta reafirma e compromiso di JetBlue cu Aruba. Tambe a confirma cu durante e mesun periodo lo opera vuelonan cu e servicio premium ‘Mint’ for di e mercado di JFK (New York).
Dialuna ultimo, Aruba Tourism Authority (A.T.A.) a reuni cu JetBlue Airways pa reforsa e bon colaboracion y conexion cu e aerolinea. JetBlue ta un socio di suma importancia pa Aruba, como e di dos aerolinea lider den capacidad di asiento y e aerolinea number un den transporte di turista pa Aruba, si considera resultado di promer mitar di 2023. JetBlue a trece un total di 140,808 bishitante pa nos isla den e periodo
aki. JetBlue ta opera vuelonan for di 3 aeropuerto clave, esta JFK, Newark y Logan Airport na Boston. Biaheronan por goza di vuelonan cu e A321Neo cu ta entre otro ofrece e servicio premium di ‘Mint’ riba e vuelonan pa Aruba. Pa duna un ilustracion di e importancia di JetBlue, por bisa cu den luna di juli e aerolinea ta ofrece un total di 37 vuelo semanal cu ta inclui 14 di Boston, 22 di JFK y 1 di Newark.
E reunion a conta cu presencia di Jo-Anne Meaux Arends – Business Development Executive (AAA), Joanne Trimon – Research & Development Officer (AAA), Ronella Croes – CEO (ATA), Sanu Luidens – CMO (ATA), Sjeidy Dijkhoff-Feliciano – Area Director North America (ATA), y representante di JetBlue Andrew Uzenoff – Manager Route Planning, Eric Friedman – Director, Route Planning y Nicole Goveas –
Manager Revenue Management.
Durante e reunion productivo, a discuti strategianan pa sigui mantene e bon cooperacion cu a contribui na haci Aruba un destino sobresaliente den e portfolio completo di JetBlue. A indica cu demanda ta sigui ta sobresaliento compara cu otro destinacionnan. Durante e reunion, tambe a discuti e oportunidadnan pa traha riba puntonan pa futuro, planes pa sigui aumenta e fluho di pasahero pa Aruba y a combersa di maneranan pa mehora e experencia di biahe pa bishitantenan.
Aruba ta di suma importancia pa JetBlue tambe. Si tira un bista por ehempel riba juli 2023, Aruba ta e di 5 destinacion cu mas asiento aereo di JetBlue den Caribe (fuente: DIIO). E importancia a ser confirma tambe ora confirma cu Aruba ta sigui ta un top destino pa nan den e region di Caribe y Latino America.
A.T.A. y AAA ta mira e importancia di mantene bon comunicacion y cooperacion constante cu socionan den e industria di turismo. Banda di JetBlue, ta reuni regularmente cu otro aerolineanan importante pa nos isla, manera American Airlines, Delta Airlines y United Airlines, cualnan ta forma parti di e top 5 aerolineanan for di e mercado di Merca.
Tanto A.T.A. como tambe AAA y JetBlue ta entusiasma pa sigui traha hunto pa desaroya e industria di
turismo di Aruba, promoviendo crecemento economico pa nos isla.
JETBLUE NA ARUBA
Tabata riba un 15 di september, pero na aña 2006, cu e aerolinea JetBlue a start operacion na Aruba, cu varios vuelo diario, for di John F. Kennedy International Airport (JFK), cu ta su base na New York. Di biaha despues di esey na 2007 a lansa servicio semanal for di Boston (BOS), cu despues a bira servicio diario. Bo ta corda e dia special na 2014 ora cu JetBlue a trece Aruba su di 1 miyon pasahero pa e aña ey pa Aruba? Na januari 2017, JetBlue a agrega servicio for di Fort Lauderdale (FLL) y na november 2020, a agrega su ultimo destinacion cu ta Newark (EWR).
E network actual di JetBlue for di e area ‘northeast’ y ‘south’ for di Merca pa Aruba ta un testamento di JetBlue su confiansa continuo den e destinacion. Pa varios aña JetBlue tabata e “carrier” mas grandi di AUA Airport, cu un market share di 27% di tur buelo cu ta sali for di Aruba. AUA Airport su partnership cu JetBlue ta hopi valioso y a crece fuerte y resiliente, specialmente durante e temponan dificil tras di lomba. Danki na e partnership fuerte crea den e ultimo 17 añanan, AUA Airport tin e confiansa cu AUA Airport lo sigui gosa di un relacion fructifero cu JetBlue pa hopi aña mas.
TOCANTE JETBLUE
A funda JetBlue na augustus 1998, pues apenas 24 aña pasa, pero a cuminsa bula 23 aña pasa, dia 11 di februari 2000. E aerolinea ta conta awendia cu 287 avion, bulando riba 1000 vuelo pa dia pa 104 destinacion rond mundo. E destinacionnan ta varia den Merca, Canada, Mexico, Caribe, Centro America, Sur America y sin lubida Europa. Dos aña pasa el a conta riba 22.000 empleado den servicio directo di e compania. Su ciudadnan principal cu e ta sirbi mas ta Boston, Fort Lauderdale, Los Angeles, New York, Orlando y San Juan. Su programa pa pasahero frecuente yama TrueBlue. Nan ta un miembro activo di OneWorld, SkyTeam y Star Alliance.
