Diasabra awo Aruba Badminton Federation ta lansa un otro sport den aire liber, den e caso aki, Air Badminton. Terence Sybesma, Presidente di Aruba Badminton Federation a indica cu dia 24 di februari proximo, lo lansa air badminton.
Ta conoci cu badminton ta un deporte cu ta hung’e den un luga cera, pero e biaha aki nan a dicidi di bin cu algo otro. E lo cuminsa pa 4:00pm te cu 7:00pm, n’e area di Beach Tennis patras di Eagle Bowling.
E evento ta uno totalmente habri. Mas cu claro, e hungadonan di badminton mes tambe lo bay t’ey. Ya caba e hungadonan a bin test e santo pa nan tin un idea kico e ta pa hunga den santo blanco. E idea ta pa tur hende bin gosa di badminton.
BADMINTON
Sybesma a splica cu badminton ta mas dificil cu hopi hende ta kere. E ta e deporte di racket mas lihe di mundo.
Na Europa ta hung’e den camping, pero e deporte mes ta tin cu hung’e paden, sin biento, ya cu e shuttle mes ta hopi ‘light’, e racket ta ‘light’. E ta un deporte cu ta exigi hopi energia, hopi pensamento y hopi forsa.
Esaki ta e prome biaha cu ta organisa ‘air badminton’. E ta un deporte relativamente nobo, pero nobo na Aruba. A crea esaki na 2019, pero ya caba tin 160 pais ta hungand’e caba.
Na 2021 a tene un torneo di airbadminton na Rotterdam, Hulanda. E shuttle ta traha pa bientonan di 12 km/h y e siman aki e ta den careda di 36 km/h. Esaki sigur lo hacie un reto pa diasabra, pa cual Sybesma ta spera cu pa diasabra e biento lo por a calma poco, pa cual e torneo lo por ta hopi mas ‘gezellig.’
Tin cuater cancha cu lo uza y tur hende por yega y bin disfruta di un rato agradabel diasabra awo.
