Docentenan di Openbare Avondleergangen Aruba (OAA) a reuni cu Minister Rudy Lampe, riba e poblematica di losse uren. Pero, tabata tin un otro situacion cu a presenta mientras tanto. Normalmente e cursonan di OAA a cuminsa durante e prome siman di september, y a base di esaki, studiantenan a presenta na e scol, keriendo cu nan ta bay cuminsa les, pero, a haya nan mes ta bay bek, pasobra scol lo bay cuminsa dia 9 di september proximo.
Mientras tanto nos a combersa cu docente Juancho Rasmijn, kende a splica cu ainda nan tin cosnan pendiente cu e minister. A bis’e cu el a pone pa traha losse uren, na luga di traha overuren. Asina aki, segun Rasmijn, nan ta bay hopi atras den salario. E docentenan ta prefera di no traha si cos ta asina. Diabierna cu a pasa a combersa cu e minister y a bis’e cu lo a bay na un areglo cu ta bay cuminsa dia 2 di september y lo sigui negosha, pa asina duna espacio na cada docente pa e mes dicidi si e ta keda of e ta bay.
Alumnonan di OAA a presenta na scol y a manda tur cas bek
Posted by 24ora on Monday, September 2, 2019
Hopi di e docentenan ta mira cu nan a bay hopi atras den salario. Ta papia di un OAA cu tin mas di 30 aña cu ta pagando e docentenan overuren, cu a mira cu a bira manera un derecho adkiri.
Imagina tur e esfuerso cu nan ta haci pa bin traha anochi y awo ta paga losse uren. Si paga losse uren, e docente mes ta dicidi si e ta bin paga e dia ey si of no. Awor aki nan ta den combersacion cu e minister pa mira ki areglo por yega, mira kico e por haci pa e docentenan. Si e minister kier pa traha losse uren, tin cu sigui negosha. Den e negociacion por wak con leu por yega. Durante di e reunion di dialuna anochi, a papia cu e minister, cual e minister a propone di paga nan un luna di overuur, pero e resto losse uren mas un toelage. E minister a menciona cu tin cu calcula cuanto e toelage ta. E docentenan kier sa di awo pa asina nan prepara kico lo bin pa nan.
Ta un total di 63 dia cu nan lo perde di salario, esta 60 dia di vakantie, plus 3 ATV. Ningun docente ta bay dilanti asina. Ta atras e ta bay. Loke e docentenan kier ta un fase transitorio di un pa dos aña, e ora por sigui negosha. E minister a menciona cu por wak si ainda e aña aki por paga e docentenan na overuren, pero mester warda un contesta di su parti. E por bay un aña mas e ora, manera cu a pidi, esta un aña transitorio, caminda cu e docentenan por keda cu nan overuren. Pa e siman aki e minister tin cu duna un contesta. Si no haya un contesta, ta keda na cada colega, ki decision e ta duna. Si e kier sigui of no kier sigui.
A manda alumnonnan cas
Manera ya menciona, alumnonan a presenta na scol, pero nan a haya nan mes ta bay bek cas, pasobra scol ta bay cuminsa dia 9 di september proximo. Rasmijn a menciona cu OAA ta cuminsa normalmente e prome siman di september. Ta lamenta cu no a informa ningun hende di esey. Tin studiante ta bin cu bus for di San Nicolas, pa bin tende cu no tin les. Ta te otro siman tin les. E cos ta asina facil cu por a avisa den tur media, pa tur hende sa kico ta pasando. No laga tur hende yega. E docentenan a haya hopi fastioso e situacion aki.
