Ta for di awe merdia cu Ministerio Publico a manda informa henter prensa cu a prolonga detencion di parlamentario Benny Sevinger cu 60 dia mas, cu mesora den redaccion di 24ora.com a reta e noticia debi cu e no ta cuadra. A dura un rato prome cu e fiscal cu a ordena pa saca e relato di prensa por a “bin bij” di su “happy hour” awe diabierna, pa realisa cu falta henter un siman ainda prome cu yega na e scenario aki. Un rato pasa Ministerio Publico a confirma e ponencia di 24ora.com y a disculpa pa e “eror” cometi cu e politico.
Manera ta conoci, a detene Benny Sevinger dia 26 di mei ultimo, bou sospecho cu lo tin di di haber cu e caso Avestruz. Ta acus’e di ta e sospechoso principal den e caso aki, den cual ta investigando si acaso ciudadanonan of comerciantenan a beneficia door di haya terenonan di gobierno. Den esey ta investiga e rol di ex-minister Sevinger, si e lo a facilita e proceso aki y probablemente cu beneficio financiero of di fabornan personal.
Pero, den e procedura penal, un sospechoso ta cuminsa na haya 2 dia, prolongacion cu 8 dia y despues por haya te cu 16 dia mas di prolongacion pa yega te na 26 dia di detencion. Si conta e dianan, anto e proceso di prolongacion lo yega na turno pa atende mas of menos dia 21 di juni proximo. Bisando esey, ta henter un siman ainda falta pa pasa prome cu fiscal por pidi hues-comisario pa prolonga e detencion y pas’e over pa “gevangenhouding” den cual ta haya un maximo di 60 dia. Cu e relato manda robes awe, ya henter comunidad sa si e intencion di fiscal pa cu detencion di e politico, cu ta participando den eleccion aki dos siman!
Abogado David Kock a reacciona di trempan caba na 24ora.com bisando: “E relato di Ministerio Publico ta robes. Na ningun momento a procesa Benny Sevinger y si acaso el a bay dilanti hues-comisario, nos tambe como su abogadonan mester ta cu ne. Esey definitivamente no a sosode, pasobra e dianan no a yega ainda”.
Un rato despues, ora cu Ministerio Publico a acepta cu nan a manda informa algo cu nunca a sosode, mesora abogado Demis Illes di e mesun ekipo di bufete di David Kock, a reacciona sorprendi. “Holo, esaki ta un blunder si”, referiendo na un relato cu husticia ta manda riba un parlamentario, e caso di mas “high profile” di momento y toch ta comete un eror asina grandi. E ta pone hende pensa hopi riba e intencion di husticia rond di esaki y nan forma determina pa purba mete den resultado di eleccion parlamentario di dia 25 di juni.
