Oposicion tambe sea sincero y hunto ban kibra cabes riba e topico aki
Despues cu siman pasa Otmar Oduber, ex minister, a anuncia su regreso den e arena politico, un di su comentarionan cu a capta hopi atencion tawata e hecho cu e la boga pa un dialogo nacional riba e topico di bahamento di gasto den e aparato di gobierno.
“Ta basta cu aumenta tarifa aki, cu introduci medida aya of bin cu mas impuesto riba lomba di tanto nos comerciantenan y particularmente nos pueblo, cu na final di dia ta esun cu tin cu paga pa esaki di tur manera. Nos hendenan simplemente no por carga mas e peso di decisionnan unda ta keda aumenta costo di bida y costo di haci negoshi na Aruba, e cos aki mester stop awo” asina e ex minister di entre otro turismo y infrastructura a duna di conoce. E la sigura cu a yega ora pa stop cu e maneho di hisa costo di bida riba nos pueblo y a lansa e demanda na gobierno y prome minister pa habri awo mes un dialogo riba exclusivamente bahamento di gastonan den gobierno.
Oduber tawata hopi categorico den su ponencia cu ta ora pa tuma decisionnan na interes di e pueblo. Decision nan cu porta no ta popular na corto plazo, pero cu ta necesario awo pa asina salvaguardia nos futuro a largo plaso, evitando cu ta introduci mas medida. “Tur prijs a subi, tur servicio a subi, practicamente tur impuesto a subi, gasolin ta subi mas cu e ta baha, awa a subi, coriente a subi, gas a subi, recoge sushi a subi, cuminda a subi, y asina por sigui menciona. Ta p’esey cu un dialogo riba bahamento di gasto den gobierno mester tuma luga awo. No por warda ni un dia mas”, segun Otmar Oduber.
Mas aleu, el indica cu gremio- y sindicatonan, gobierno y oposicion mester uni pa logra e meta aki di baha gasto drasticamente y na un forma structural. “Oposicion tambe mester madura y realisa cu no por sigui ta populista. Oposicion tambe tin un tarea di coregi tur loke a bay robes den pasado y carga como posibel futuro mandatarionan e responsabilidad pa crea un miho futuro pa e siguiente generacion nan”.
Oduber a mustra riba e hecho cu tin hopi departamentonan di gobierno cu por sea privatisa, independisa of elimina. E ultimo aki den e sentido cu por unifica varios departamentonan. Tambe e la menciona cu mester depolitisa nombramento di personal den gobierno awo, lagando esaki den man di un fundacion cu participacion di esunnan responsabel den gobierno hunto cu gremionan den e sector priva y instancianan concerni. “Gobierno su tarea mester bira uno di pone e criterionan pa cu nombramento pero lagando e tareanan pa cu esaki den mannan apolitico. Asina bo ta kita e presion fo’i riba e politico y di otro banda ta crea e espacio pa e miho personanan pa e posicionnan vacante keda tuma”, Oduber a comenta.
“Tin un cantidad di departamentonan di gobierno cu ora bo independisa of privatisanan, lo haci cu nan ta bira hopi mas eficiente creando hopi mas productividad, cual tambe ta yuda baha gasto. Ta vision, determinacion y accion mester tin pa logra esaki”, e ex minister a finalisa bisando.
