Tur hende mester ta na haltura cu tin dos tipo di orguyo: Orguyo legitimo cual ta e orguyo deportivo, pa estudio, haci un bon trabao, cual ta wordo celebra y reconoce ora un persona gana e premio maximo.
Orguyo di pica ta ora hende ninga di reconoce Dios ( Romanonan 1:18-32) pa asina e por sigi biba den pica di abominacion, rebeldia y inmoralidad, poder, manera rey Saul, Nabucodonosor,Uziah,Haman,y tambe Lucas 18:10-13.
Awel e tipo di orguyo ta esun cu Dios ta odia y ta para scirbi: E temor di Dios ta pa odia maldad,orguyo, arogancia y mal caminda, y un boca perverso mi ta odia.(Proverbionan 8:13).
Ora orguyo bini, deshonor tambe ta bini, ma sabiduria ta serca e humildenan. ( Proverbionan 11:2)
Cada hende cu ta orguyoso di curason ta un abominacion pa Señor, siguramente e lo no keda sin castigo.(Proverbionan 11:5).
Orguyo ta bini prome cu destruccion y un spirito arogante prome cu caida.(Proverbionan 16:18).
Cada hende cu scohe pa biba den orguyo pecaminoso, caminda inmoralidad ta goberna ta scohe pa separacion di Dios.
Y Dios ta manda aviso : Pesey scritura ta bisa: Dios ta resisti e orguyosonan , ma ta duna gracia na e humildenan. ( Santiago 4:6),
E otro ta specialmente pa hobennan pa nan no cay den e trampa di orguyo y arogancia:
.
E Palabra di Dios ta bisa (1 Pedro 5:5) Boso hobennan mescos sea sumiso na boso ancianonan, y boso tur bisti boso mes cu humildad pa cu otro, pasobra Dios ta resisti e orguyosonan, ma ta duna gracia na e humildenan.
Dios semper ta spierta pasobra E ta esun cu ta dicidi, y den Romanonan 1:28-32 Dios a dicidi cu esnan cu no ta haya ta necesario pa reconoce Dios , Dios lo entrega nan na un mente perverso.
Esaki ta nifica pa nos tur e peliger cu tin y cu ta aumentando dia tras dia, pa ora nos mira cosnan ta sosode, nos no keda boca habri of busca excuus , pero sabi cu ta e furia di Dios ta bahando riba hende.
Ora nos mira cambio den karakter, cambio den actitud di hende,nos tin cu comprende cu e falta no por wordo tira riba otro hende, bruheria, falta di trabao etc, pero riba locual hende a scoge pa nan bida.
Awor ora nos complace cu hende pa e no reconoce Dios, y nos ta habri porta y pasa un ley, caminda tur tipo di libertinahe, y abominacion y falta di respet por tuma luga, nos ta bira complice di nan orguyo y lo nos tin carga e consecuencia ( Romanonan 1;32) (Romanonan 2:5).
Cada ayudo, cu un hende di sano huicio, duna na esunnan cu ta dicidi di laga orguyo domina, ta nifica kibra relacion cu Dios, pasobra esey na nifica duna e diabel bentaha legal den bida di hende.
Laga nos tuma un ehempel : Si un mayor ta duna su yiu ok pa e su amigonan, por usa tur sorto di droga na su cas. E mayor ey a habri porta di destruccion pa su propio yiu.
Si un hende coopera cu un persona orguyoso , pa e rechasa Dios y bay mas profundo den inmoralidad abominacion y arogancia bo ta bira un piedra di trompica den su bida.
Orguyo di hende lo rebah’e, ma esun cu ta di spirito humilde lo ricibi Honor.( Proverbionan 29:23),
Ora Dios ta odia algo, no tin hende cu por cambia e situacion, solamente confesion y arepentimento, y aparta for di pica, por trece cambio, y por trece salbacion.
Awor ta e momento pa reconcilia cu Dios.
