E storia di ENNIA, como compania di seguro cu ta resorta bou di supervision di Banco Central di Corsou y Sint Maarten ta un ehempel bibo con por laga un situacion malo dura mucho largo y cu awe tin consecuencia masha desagradabel pa miles di spaardo. Hulanda ta asina preocupa, cu nan a ofrece di dia Gobierno di Corsou y Sint Maarten placa pa evita un desaster, pero ambos pais a nenga e fiansa, argumentando cu nan mes lo hinca mas di un biyon florin den e fondo, pero pocopoco den 30 aña largo. Aunke Aruba ta for di e desaster aki, no por kita cu ora sla cay ayabanda, nos tambe ta sintie aki banda. Y esey ta precisamente locual Banco Central di Aruba kier evita!
ENNIA Aruba ta solido
Mester menciona cu, contrario na Corsou, e entidad di ENNIA na Aruba ta solido financieramente y bon maneha y supervisa door di Banco Central di Aruba. E ultimo temponan aki ENNIA na Aruba tabata envolvi den compra di varios bono di Gobierno, etc. Na cualkier momento nan tin por lo menos 900 miyon florin disponibel pa inverti, pues ta financieramente saludabel. E cos ta cu na momento cu Ansary Group a purba cuminsa cu wega, mesora Banco Central a cay aden y a ordena pa haci e banco independiente, cu su mesun directiva y hunta di supervision di Aruba mes.
Banco Central di Corsou a faya mahos!
Mescos cu aki, na Corsou e doño, Ansary Group a percura pa hinca algun hende prominente, entre otro ex-gobernadornan den e Hunta di Supervision. Tabatin hendenan di influencia den banco, hasta liga den cierto forma na Banco Central di Corsou cu tabata cerca di e compania. Asina a haci cu e control a bay di un forma diferente pero sigur deficiente. A gasta placa di e spaardonan di pensioen, cu awor ENNIA Curacao no tin suficiente placa pa cubri e prima di su pensionadonan. Di cada 100 florin cu e tin cu paga na prima, e tin 45 florin so, pues menos cu mita! E bon noticia ta cu na Aruba e fondo ta bon cuida y saludabel, suficiente pa cubri tur prima, tur luna di tur pensionado.
Corsou mester inyecta
E problema no ta Aruba, sino ENNIA na Corsou. Ey awo mester hinca un suma substancial pa por garantisa e fondo di pensioen. Ta papia di riba un biyon florin, cu mester cubri den e siguiente trinta añanan. Ta pensando pa saca e parti di pensioen cu ta malo for di e compania, pa por purba bend’e. E reto ta cu si saca e parti ey afo, cu e parti di pensioen di Aruba, cu si ta saludabel, lo resorta bou di Gobierno di Corsou, aunke cu e ta bou huridiccion y supervision di Banco Central di Aruba. Y ta aki e “e rabo di porco ta krul”, pa cual na nivel politico ta forsa pa e Banconan Central por yega na otro pa bon di e cobradonan di pensioen di Corsou y di Aruba.
Tin interesado pa cumpra ENNIA Aruba
Mester menciona cu tin varios grupo, mayoria di comerciantenan local, cu ta dispuesto pa cumpra ENNIA Aruba. Pero, pa por yega asina leu, Banco Central di Aruba mester aproba e benta y mester mira con Gobierno di Corsou ta para den esaki. Manera a splice mas ariba, lo mester los e fondo di ENNIA Leven entre Aruba y e otro islanan. Y laga Gobierno di Corsou inverti y keda maneha e fondo pa pensionado di eynan y laga e compania nobo cu cumpra ENNIA Aruba sigui padilanti cu e pensionadonan cu ta spaar nan cen eynan tur luna.
Historia di ENNIA
E compania a surgi for di e compania di seguro Hulandes “Eerste nederlandsche / Nieuwe Eerste Nederlandsche” y a permanece activo na Antias desde aña 1948. Despues di e fusion na aña 1969 cu NILLMIJ (Nederlandsch-Indische Levensverzekering – En Lijfrente-Maatschappij) e nomber a bira ENNIA. Na aña 1983 el a fusiona cu AGO Verzekeringen pa forma Aegon. E nomber ENNIA a keda na Antias como ENNIA Caribe.
Nuts OHRA a cumpra ENNIA Caribe na aña 1998, cu na su turno a fusiona un aña despues y a keda bou di Delta Lloyd. Na aña 2002, ENNIA a asumi e actividadnan Antiano di “De Amersfoortse”, cu a cuminsa na aña 1989. Na aña 2006, Grupo Parman di empresario Irani-Mericano Hushang Ansary a cumpra ENNIA Caribe.
Propiedad di Parman Group
Na juni 2016, a critica ENNIA despues cu su posicion financiero a baha considerablemente pa problema di organisacion y dos transaccion importante cu e companianan di e unico accionista Ansary. Como resultado di e dos operacionnan aki, cu un balor total di 570 miyon Euro, tres cuart di e balans di e aseguradonan di bida ta consisti di inversion den otro compania di Ansary.
Ademas, segun De Nederlandsche Bank (DNB), e forma di traha aki tambe ta contrario na e reglanan contra conflicto di interes. For di aña 2010, varios denunciante a informa autoridad di supervision di transaccion potencialmente inelegibel, pero e autoridad di supervision Hulandes a tarda te na aña 2014 pa cuminsa un investigacion.
Corte a cay aden
DNB y Banco Central di Corsou y Sint Maarten (CBCS) ta supervisa ENNIA. E relacion entre politica y negoshi ta estrecho na Corsou, specialmente pa ENNIA. CBCS na comienso di aña 2019 a calcula e deficit di ENNIA na mas cu $8800 miyon. Reinald Curiel tabata CEO di ENNIA y tabata e unico director cu por a keda despues di mei di 2018 ora CBCS a interveni. E otro miembronan di e hunta y e comisarionan a keda destitui. Na juni 2020, tambe a retira Curiel.
Dia 29 di november 2021, Corte di Corsou a dicidi cu e doño Hushang Ansary a saca hopi placa fo’i ENNIA (uitgehold). E mester a paga mas di un biyon florin di Antias, rond di € 500 miyon, como compensacion. Corte a dicidi cu ENNIA no a actua na interes di e aseguradonan y no a cumpli cu e deber special di diligencia cu ta aplica na e directornan y e supervisornan di un seguro (di bida). Ademas, nan no a responde na un manera adecua na e comentario critiko di nan mes organisacion y na e advertencianan continuo y exhortacion di CBCS.
Hulanda kier a saca un man
Debi cu e doño a apela y no a paga nada, e gabinete saliente Hulandes Rutte IV a dicidi den un carta di dia 25 di augustus 2023 pa asigná € 600 miyon como sosten. Si no, e pensioennan na Antias mester a baha cu 80%. E sosten financiero ta permiti un reinicio di e asegurado y duna den forma di un fiansa, cu interes variabel. College Financieel Toezicht (CFT), un regulador finansiero di ex-Antias, a rechasa e fiansa. Segun CFT, a establece acuerdo den e ley pa evita cu un posicion di debe insostenibel surgi. E prestamo aki ta aumenta e debe publico y e cargonan di interes, creando un situacion financiero potencialmente insostenibel pa e paisnan receptor.
Riba dia 12 di september 2023, Corte Comun di Husticia di Corsou a emiti un tussenvonnis.
Tocante ENNIA
ENNIA ta considera un lider entre e companianan di seguro cu 75 aña di experiencia y mas cu 200 empleado den oficina na Aruba, Boneiro, Corsou y St. Maarten, ENNIA ta e seguro di mas grandi den Caribe Hulandes. Como un di e poco companianan di seguro di servicio completo den e region, e ta ofrece su clientenan un variedad amplio di producto cu hopi opcion.
ENNIA ta activo den Caribe Hulandes for di aña 1948 y ta deriva for di e compania di seguro Hulandes “First Dutch/ New First Dutch” (Eerste Nederlandsche/Nieuwe Eerste Nederlandsche: EN / NEN).
Na aña 1981, ENNIA a fusiona cu AGO Insurance, despues di cual e compania mayor a cambia nan nomber pa Aegon. E nomber ENNIA a gana asina tanto reconocemento den Caribe Hulandes cu no a cambia e nomber di ENNIA. Na 1998, Nuts OHRA a cumpra ENNIA y un aña despues pa Delta Lloyd. NA 2002, Amersfoortse Antilles a tuma ENNIA over. Cuater aña despues, Delta Lloyd a bende su accionnan di ENNIA Caribe Holding NV na Parman International BV, cu a bira e unico accionista di e grupo di empresa di ENNIA.
ENNIA Caribe Holding NV ta un empresa totalmente independiente bou di ley di Corsou. Su actividadnan di seguro ehecuta pa cinco compania operado, cu ta ENNIA Caribe Schade NV (seguro general), ENNIA Caribe Leven NV (Seguro di bida), ENNIA Caribe Zorg NV (seguro di salud), ENNIA Caribe Schade (Aruba) NV (seguro general) y ENNIA Caribe Leven (Aruba) NV (seguro di bida).
