Faltando algun minuut pa 6:00pm a sosode un accidente na e crusada Emanstraat y Emmastraat den centro di ciudad. Un auto SUV marca Buick numera A-67574 coriendo riba Emmastraat no a para pa duna preferencia na un bus grandi di Arubus biniendo riba Emanstraat direccion pariba. E bus a dal den e auto. No tabatin herido, aunke cu e chauffeur di e Buick tabata bastante spanta na e sitio.
E chauffeur di Arubus a notifica su central mesora di e accidente y den algun minuut a yega un otro bus na e sitio pa busca e pasaheronan cu a keda atras na e sitio di desgracia. E bus a caba di sali for di nan stacion principal banda di Royal Plaza Mall y tabata coriendo direccion San Nicolas.
Pa un motibo of otro e SUV no a duna preferencia na e bus y a djis crusa riba e crusada. E bus a dal den dje den su banda.
Mester menciona cu casi tur dia tin accidente na e crusada aki. Kico mas por haci, no ta conoci, pasobra ya a pone sleeping-police eybou, a pone un borchi grandi di STOP…pero asina mes automobilistanan no ta respeta e crusada ni ta duna preferencia na esunnan coriendo riba Emanstraat.
