Den un combersacion cu e miembro di sindicato SPA, Omar de Kort, el a confirma cu loke a wordo entrega durante e reunion di SPA na POVA tabata un mocion y no un carta. De Kort a yega di forma parti di directiva di SPA den pasado y a ocupa e funcion di secretario.
El a bisa cu riba e documento ta para bon cla cu ta trata di un mocion. Y esaki ta debi na e malcontento di un grupo di miembronan di SPA pa e falta di transparencia di parti di e directiva pa cu su miembronan. El a enfatisa cu nan no tin ningun problema personal ni cu e Presidente ni e directiva, pero loke pa nan ta e problema ta e falta di transparencia.
E no a bay den contenido di reunion mes. Pero si e por bisa cu e reunion tabata mas bien uno informativo pasobra ora cu kier a dialoga cune riba e puntonan, el a bisa pa laga esaki na final. Na final e directiva a acepta e mocion y a vota riba dje unda cu mas cu 37 miembro a vota na fabor di e mocion en cuestion. Despues a bira puntra kendenan ta contra, y aki 7 man a bay laira. Tabatin hende den sala cu no a vota tampoco, kisas pasobra nan no ta miembro of no kier a vota, de Kort a bisa. E grupo aki ta hopi chikito. Pues un mayoria tabata na fabor di e mocion. Despues di esey el a sera e reunion di biaha. E Presidente a bisa cu e mocion no a wordo acepta pasobra e mester ta 25% di e miembronan di e sindicato cu mester vota na fabor. Riba esaki de Kort a señala cu e Statuut ta bisa cu 25% di e Bestuursleden mester ta presente y 6 di e 7 miembronan di e directiva tabata na fabor. Mirando e votacion, e directiva mester a wordo baha inmediatamente mirando cu 37 persona, of mas, a vota na fabor di e mocion.
Den concepto di de Kort, despues di e votacion di e mocion, aki 6 siman lo mester tin un eleccion nobo. Pero e ta sperando riba e pensamento di un hurista riba e asunto aki.
El a bisa cu den e ultimo lunanan Edgard Maduro a bay papia den nomber di miembronan di Bond sin cu niun momento el a consulta cu nan. Recientemente mes tabatin un problema ora cu el a yama su miembronan pa cobarde, cual expresionnan a sinti como un insulto grandi den nan direccion. Riba esaki a manda un carta pidiendo pa un reunion riba e tema. Segun de Kort, e niun momento a tuma nota cu tabatin un disculpa publico di parti di e Presidente na su miembronan pa yama nan lagadishi y cobarde. Y durante e reunion mes mester a pusha basta pa e por pidi disculpa na tur esnan presente.
Nan tin problema cu e ta tuma decisionnan sin consulta cu e miembronan. Tin chat group di miembronan, pero e mes (de Kort) no ta den e grupo y casi ningun di Justitiele Dienst. “Nos tur ta Polis y no mester tin distinccion den esnan cu ta traha den Cuerpo Policial.”
De Kort a bisa cu e ta sigur cu tin grupo cu ta dispuesto pa postula nan mes den e eleccion. Inclusive su persona mes.
Ta berdad tambe, el a bisa, cu a vota pa paga su gastonan di un accidente cu tabatin cu Hendrik Croes. E miembronan a aproba pa paga e gasto aki. De Kort no ta compronde di con e Presidente mes no a aserca e directivanan anterior pa corda pa paga e cuenta en cuestion. E Bond a acorda pa paga e suma cu esaki tabata na inicio.
Otro preocupacion cu un grupo di miembro di SPA tin ta cu nan no tabata na altura di un reunion cu e directiva tabatin cu Minister di Husticia riba e nombramento di un Cuerpo Policial. Pero esaki no ta e “issue” cu nan ta discutiendo riba dje. Nan problema ta cu supuestamente miembronan a bay di acuerdo pa papia cu Minister pa exigi cabes di Korpschef. Esaki ta algo cu nan como miembro no a aproba.
