Diabierna awo 1 di september pueblo di Aruba ta keda cordialmente invita pa un e
ceremonia y celebracion na ocasion di apertura di brug nobo na Spaans Lagoen. E anuncio a bin di parti
di Carlos Zubieta durante un conferencia di prensa ofreci diamars mainta. “Nos ta ofrece un evento pa
conmemora e culminacion di e obranan como un muestra di aprecio y danki na e comunidad di Aruba pa
e esfuerzo y compromiso; ayudo y comprension demostra durante ultimo dos aña,” asina e Project
Manager a duna di conoce.
ODINSA y CIC ta consciente y ta compronde cu e trabounan grandi di infrastructura haci na e arteria vial
di Playa pa San Nicolas, aunke ta sumamente necesario, a trece cierto inconvenientenan cu a afecta e
movilidad di e automobilistanan. Cu e celebracion aki nos kier yama danki pa tur e pasenshi cu e
comunidad di Aruba tin. “Ya nos ta terminando e fase di construccion di e proyecto y e espera di varios
decada ta yegando su fin,” Zubieta a declara.
Grupo ODINSA S.A. y Caribbean Infrastructure Company N.V. (CIC) ta e companianan encarga cu diseño,
construccion y tambe mantencion di Green Corridor. Fuera di Zubieta, e conferencia di prensa a conta
cu presencia tambe di Michael Vrolijk, Project Manager di parti di Departamento di Obranan Publico
(DOW) y Alex Amalfi, Director Financiero di ODINSA kende a yega Aruba pa reemplasa Zubieta. E ultimo
aki a acepta algun luna atras un posicion mas halto cu un un compania similar na Colombia. ODINSA y
CIC ta yama danki pa su trabou na Aruba y ta dese’e hopi exito cu su reto nobo.
E celebracion ta pauta pa cuminsa pa 7’or di anochi y lo core te 12’or. E lo ta ubica riba e brug nobo mes
y lo tin diferente momentonan special durante e anochi pa marca e dia special aki pa Aruba. Un y tur ta
bon bini pa yega diabierna anochi na e brug pa asina comparti y ta testigo di e momento historico aki. Di
un manera simbolico ta bay refleha e conexion entre pariba y pabou. E apertura simbolico lo ta
diabierna anochi, mientras cu dialuna mainta e acceso pa autonan lo inicia.
