Durante e conferencia di prensa cu Minister di Asuntonan Economico, mr. Geoffrey Wever a ofrece diahuebs mainta, a tuma oportunidad pa haci pregunta riba e expectativa cu e ciudadano por tin pa cu prijs di gasolin den e proximo lunanan.
E pregunta ta tene cuenta cu e conflicto entre Ucrania-Rusia tin tendencia pa intensifica y ta bin e lunanan di Winter na Europa caminda lo tin un demanda mas halto pa combustibel; pa cual Hulanda lo ta creando un fondo di emergencia como plan di contingencia. Na esaki, Minister Wever tabata breve pa bisa cu ta monitor e prijs di gasolin tur dia y cu ta mira esaki ta keda baha.
“Aworaki nos ta monitor e prijsnan. Atrobe indicacion ta cu e prijs tin dos pa tres luna bahando. Ta monitor tur dia pa wak den ki direccion e ta bay. E ultimo informacion ta cu atrobe tin un bahada den e prijs,” e titular di Asuntonan Economico a indica. Basa riba esaki por spera e ora ey cu den luna di october atrobe lo conoce un reduccion den prijs di gasolin y diesel.
