Tin cierto hendenan tin hopi curashi. Un curashi pasobra tin Toque de Queda valido na Aruba vigente y asina mes ta viola esaki. Sin motibo valido, manera a sali laat for di un sitio y no a yega cas trempan. Diadomingo un grupo di persona a simplemente viola TDQ pa ta den un happening entre nan mes.
Tabata rond di 12.45 di madruga cu un patruya atento a tuma nota di un fiesta clandestino riba un parkinglot pabou di e edificio di ex Kong Fui Supermarket na Meiveld.
Riba e parkinglot, cu ta uno priva, tabatin en total nuebe (9) persona sinta rond di un ijsjug yena cu alcohol.
Mesora a pidi ayudo di mas patruya y vehiculo di transporte di Oranjestad, Santa Cruz y Shaba pa hiba nan tur warda. No ta conoci si nan a cuminsa celebra Dia di Hende Muhe (8 di maart), mirando cu tabatin sigur dos hende muhe den e grupo tambe.
