E Fed Cup, anteriormente e Copa Federation, ta un competencia di tennis international
pa atletanan femenino, caminda teamnan di diferente pais ta competi.
Casi 100 pais ta participa na e torneo cu ta tuma lugar desde 1963. E competencia cu ta wordo organisa pa atletanan masculino ta e Davis Cup. E Fed Cup ta gosa di hopi popularidad serca toptennistanan. Pesey hopi di e top hungadonan ta bin representa nan pais den e competencia aki. E siman aki 3 di e mihor mucha muhernan di Aruba ta biaha pa Santo Domingo pa competi pa un lugar den e region. Un total di 16 pais ta participa den e torneo.
Harry van Reek di tennischool Omnibus ta bai como coach di Aruba.
Van Reek ta pensa cu e team aki por sali den e mihor 4 nan. Van Reek ta splica cu nan a train simannan largo como team y e ta verwacht hopi di e team. E trainingnan tabata entre e 5 mihor mucha muhernan di Aruba te cu 16 aña, nr. 4 y 5 Sofie van Reek en Dana Nuñez ta para reserve. Aruba ta bai cu e team di Kayla Solagnier, Aethielle Kelkboom en Jelsyvette Croes.
