Sindicato SEPPA y director di Arubus N.V. a reuni cu mediado di gobierno pa trata e situacion cu e chauffeurnan no ta contento cu ta kita 12.6% di nan salario. E reunion aki tabata yama pa mediado, a base di un carta ricibi di Arubus, como intermediacion entre e sindicato y dunado di trabou.
Edwin Mohamed, director di Arubus N.V., a splica cu ainda nan ta den negociacion. E ta di pensamento cu pa awo no ta etico di duna comentario di kico a papia cu mediado di gobierno y e sindicato. Dia cu e chauffeurnan a protesta, gerencia no a reacciona y segun e director, pa awo nan no lo haci esey. “Nos ta na mesa ainda,” asina el a bisa.
Magaly Brito, secretario general di SEPPA, a reacciona riba e reunion aki bisando cu a yama e reunion pa motibo cu e chauffeurnan a dicidi di bay den welga mañan mainta. A discuti hopi riba posicion di cada partido, pasobra e problema tabata cu e dunado di trabou no ta bin cu mas opcion na mesa. Asina ey e trahadonan mes no por dicidi cua opcion ta miho pa su cartera.
E sindicato ta sinti, despues di basta bay bin, cu awo e partidonan ta mas habri pa sinta na mesa y negosha pa yega na un acuerdo na bienestar di tanto e compania como e trahadonan. Tambe tin otro asuntonan di cual SEPPA ta kere ta responsabilidad di e dunado di trabou pa duna e informacionnan concreto na tur trahado. Esey ta pone cu tur hende ta riba mesun linea di informacion y compronde e situacion cu tur hende ta den dje.
Na final tanto gerencia di Arubus, sindicato SEPPA y Mediado di Gobierno a yega na acuerdo cu por lo pronto, mientras cu partidonan ta na mesa, lo no tin ningun tipo di accion di parti di e trahadonan. Bisando esey, e tipo di accionnan den cual trahadonan no por yega nan trabou na tempo of alumnonan no por yega scol, no ta sigui mas mientras ta na mesa y ta negociando. Tur partido a garantisa Mediado di Gobierno esey awe.
