Ningun hende no tin amor mas grandi cu esaki, cu un hende ta duna su bida pa su amigonan (Juan 15:13) Tur hende mester corda y reconoce e amor di Dios cu a duna su unico yiu pa ken cu kere den dj’e tin bida eterna. Den e amor di Dios ta inclui tur cos:
Amor di matrimonio entre homber y muher
Amor pa relacion sexual entre homber y muher, pasobra esaki ta e relacion sexual cu Dios mes a ordena, establece y haci e un mandato pa multiplicacion.(Genesis 1:28).
Amor entre Tata, Mama y yiu,
Amor di famia.
Pasobra ta tres tipo di amor tin:
Amor Agape esaki ta amor di Dios pa hende.
Amor Phileo cual ta e amor entre mayor y yiu.
Amor Eros cual ta e amor matrimonial entre homber y muher.
Pero e amor di Dios ta resalta riba tur cos:
Pasobra, e amor di Dios ta salba, sana y libera, e ta misericordioso.
E amor di Dios no por ta envolvi den pica, pasobra Dios ta santo y caminda hende ta haci pica
consientemente, e Spirito di Dios ta aparta.
Cu esaki nos kier pone bon cla, cu ora dos persona ta envolvi den adulterio, fornicacion, y habito sexual cu Dios ta desaproba y ta abominacion den cara di Dios, eynan e amor di Dios no ta. Tur eseynan ta deseonan carnal cu no tin otro nomber cu no ta pica, y no ta importa ta ken ta haci e, pica ta keda pica.( Romanonan 18-32).
Poco poco hende ta birando digital riba e mundo aki, drentando relacionnan improductivo, caminda e amor di Dios no ta presente, pasobra hasta ora nos planta un simia di boonchi, pa e nace y crece y duna nos un ranca di boonchi pa nos come, tur esey tambe ta expresa e amor di Dios. Pasobra for di den Genesis nos ta lesa con grandi e amor di Dios ta, cu e a crea ser Humano, Flora, y Fauna. Tur ser humano, tur animal, y tur mata ta crea pa Dios, den su gran Amor.
E amor di Dios ta asina responsabel, cu prome cu Dios a crea hende, Dios a crea cuminda pa nan por come.
Aki nan ta bon ehempel pa nos como mayor bira responsabel den e criansa cu nos mester duna nos yuinan, pasobra e mayor ta responsabel pa e bon educacion di su yiu. Stima nan, laga nos stima otro, pasobra amor ta bini di Dios, y tur cu ta stima ta naci di Dios, y conoce Dios. Esun cu no ta stima no conoce Dios, pasobra Dios ta amor. (1Juan 4:7-8).
Esaki ta un wake up call pa nos hubentud:
Esun cu ta stima no por ta cana cu arma, pa tira su mes prohimo.
Esun cu ta stima no por ta bendiendo droga na su prohimo.
Esun cu ta stima no por ta sconde cos horta pa su prohimo.
Esun cu ta stima no por bay tuma vengansa pa su prohimo.
Wak bon pasobra hopi di e amistadnan di awe dia caminda hende ta yama otro brother y bati riba pecho, y haci señal cu man ta pacto diabolico, cosnan cu hobennan ta imita y nan no sa for di unda nan a sali. Amor di Dios tambe ta nifica disciplina, pasobra Dios ta disciplina esun cu e ta stima, awor ora un mayor no ta disciplina su yiu, ta pasobra e no stim’e, akinan no tin cuenta di mama soltero of casa, tur hende cu ta stima nan yiu ta educa y disciplina nan yiu.
