Den Juan 3:16 Dios a stima mundo asina tanto, cu El a duna su Yiu unigenito, pa ken cu kere den dj’E no bay perdi, ma tin bida eterno. Dios ta husto y fiel e no kier pa ningun hende bay perdi y ta duna tur hende e oportunidad igual pa scoge pasobra Dios sa cu e miho caminda ta cerca Dios mes.
Esunnan cu ta stima e berdad ta scoge pa Dios, y esunnan cu no ta stima lus ta scoge pa keda den scuridad. Awor riba e mundu aki nos tur mester arepenti, pa nos libra fo’i pica, pasobra nos tur ta bini for di e naturalesa di pica, door di Adam.
Ora nos arepenti y acepta Cristo Hesus como nos Señor y Salbador, nos tin bida nobo den Cristo Hesus. Tur cos bieu a pasa y a bira un creacion nobo. Pero si nos sigi persisti den pica conociendo e berdad, nos ta cay bao di huicio di Dios, e ta mescos cu un hende cu conoce tur regla di trafico pero toch ta core auto burachi, lo causa cu e ora ey husticia ta atende cu ne.
Awor ora un hende keda pega den su capricho, duresa di curason y maldad, tur locual ta palabra di Dios ta bira juicio y discriminacion pe , pasobra e spirito cu ta obra riba su bida, ta pone sinti su mes culpable y herida ora e scucha of lesa e palabra di Dios.
E ta bira manera un mucha rebelde cu ta bisa na cas ta laf pesey e ta riba caya, pero locual ta pasa ta cu na cas tin coreccion y disciplina. (2Timoteo 3:16-17).
Pasobra sentencia contra un echo di maldad, no lo tin un ehecucion lihe, p’esey curason di e yuinan di hende, den nan ta completamete dispuesto pa haci maldad.( Eclesiastes 8:11). No gaña boso mes, Dios no ta laga haci bofon di dj”E, pasobra tur loke un hende sembra esaki tambe e lo cosecha.( Galationan 6:7).
Nos ta purba di tur forma pa convence y haci lo maximo, pa evita tur sorto di division, trauma y dolor den famia y mas depresion di cual ta existi caba.
Ora cu predica e evangelio di Dios, nos tin cu compronde cu Dios ta papia y esey ta motibo, pa nos arepenti, cambia bida y asina alcansa salbacion. Si e palabra di Dios yega na bida di hende y e hende ta bisa pa no husgami, ni tampoco discriminami, ta pasobra e hende sa masha bon, cu e bida cu e ta biba no ta den boluntad di Dios, y e no kier sali for di bagamunderia di scuridad y asina agrada Dios.
Ningun hende traha den e imagen y semehansa di Dios no por wordo discrimina cu e palabra di Dios, pasobra Dios no tin distincion di persona y e palabra mes ta haci nos liber.
E mentira di diabel a avansa asina tanto den mundo, cu hende kier haci tur manera, pa no obedece e palabra di Dios, y haci locual cu nan kier cu nan bida, y asina acepta maldad y rechasa bondad di Dios.
Ken cu bay mucho leu, y no ta permanece den e enseñansa di Cristo, no tin Dios, esun cu ta permanece den e enseñansa, esey tin tanto e Tata como e Yiu. ( 2 Juan 1:9).
Boso anto stimanan, sabiendo esaki di antemano, tene cuidao,pa boso no wordo lastra, hiba pa medio di error di hombernan malbado y boso cay for di boso firmesa. ( 2 Pedro 3:17).
Sinceramente. Pastor Marcel Balootje.
