E homber, casa di e dama turista Mericano di 48 aña di edad, cu a cay ayera marduga for di piso halto di un crucero Royal Princess, no ta deteni. El a opta pa keda Aruba boluntariamente pa coopera cu e investigacion andando. Manera ta conoci, marduga un turista a cay for di piso halto den un boto salbabida y a fayece mesora. Polisnan di Aruba a subi e barco crucero asina cu el a mara na Aruba y a haci un investigacion riguroso.
Cuerpo Policial Aruba tabata den contacto masha estrecho cu FBI di Merca, relaciona cu e investigacion aki, den cual un Mericano a fayece. Tambe tabata den contact cu Consul General di Merca stacion na Corsou, pa tene informa di e desaroyonan di e caso andando. Mester bisa cu ayera caba a duna ordo pa haci un autopsia riba e curpa di e turista, pero te ainda no ta conoci e resultado final di hallazgo di e Patologo.
E casa entretanto ta keda Aruba pa atende cu e restonan mortal pa nan por transporta nan bek pa Merca. E ta insisti na Polisnan cu tabata un accidente y cu no tin nada di haber cu un crimen of un pusha intencional. Otro huespednan riba e crucero a bisa Polis ayera cu di trempan e pareha tabatin discusion cu otro. Tur e declaracionnan aki awor mester bira parti di e investigacion penal andando pa yega na e motibo real di fayecimento di un pasahero riba un crucero riba lama grandi, yegando Aruba.
