E bisiñanan ta sinti cu niun hende ni ningun instancia kier yuda nan mientras cu e molester ta continua. Mirando cu nan keho no ta haya oido a dicidi di haci un denuncia via di 24ora.com pa mira si instancianan concerni haci algo.
Segun e habitantenan na Sabanilla Abou, ta imposibel of nan ta duda cu ta sushi di cas ta kima tres of mas bes pa siman.
Diadomingo atrobe bisiñanan cansa di e situacion a yama Brandweer y Polis. E doño di cas mes no a sali pa atende cu Polis.
Na final a papia cu un persona kende a duna di conoce di ta un empleado. El a splica cu nan ta kima material pa haya compost cu ta bay pa e fabrica di mushroom na Barcadera.
A cuestion’e di con no ta haci tur e trabou aya y su reaccion tabata: Pa no molestia e oficina- y otro negoshinan den e area.
Nan a tuma nota cu ta kima tanto den container como riba e tereno mes. Y esaki a bin ta tuma luga pa dos luna caba, y dos te cu tres bes pa siman. A yama Polis diferente biaha caba. E conseho cu a haya tabata pa traha carta pa e minister concerni, cual nan a haci. E contesta tabata cu lo bay laga Bureau City Inspector wak e situacion.
Pero e bisiñanan mes ya caba a papia cu diferente funcionario di e departamento. E mesun contesta a haya cu for di Polis: No por haci nada. Hasta a trata di haya ayudo di DOW pero sin resultado. “Nan ta manda nos di cashi pa muraya,” tabata e comentario di un habitante.
Otro habitantenan ta pensa cu mas bien ta trata aki di un dump ilegal, pasobra loke a mira ta mas bien sushi di cas, mata, palo, etc. Pero atrobe, ta imposibel cu ta kima esaki dos of tres bes pa siman. E cas no por tin asina hopi sushi.
