Ta pa prome biaha den historia di islanan Aruba, Boneiro y Corsou, cu den e mesun luna, tur tres isla ta kibra record historico den cantidad di turista cu ta yega. Claro cada un cu un cantidad diferente, pero si cu ta e cantidad mas halto den historia turistico di cada isla. Den esey Aruba ta cana te dilanti, sigui pa Corsou y despues Boneiro.
No ta record solamente pa Aruba Tourism Authority cu ta conta e cantidad di turista total sino tambe pa Aruba Airport Authority, cu ta raporta cu na luna di maart tabatin 150,151 pasahero cu a sali for di Aruba y 151.654 cu a yega nos isla. Nunca antes Aruba a conta mas cu 151 mil pasahero yegando. Esey a hasta causa cu nos a conoce Super Saturdays, ora cu tin entre 5000 pa 6000 pasahero riba un diasabra pa sea drenta of sali di nos isla. Cu e datonan aki, AUA Airport a kibra su mesun record di hasta aña 2016, cu no menos di 25% mas pasahero cu a sali di Aruba compara cu maart 2016, pero tambe a kibra e record cu 23% mas pasahero cu a sali di Aruba den e mesun luna di maart di aña 2019.
ARUBA
E demanda pa Aruba ta sigui ta sumamente fuerte! Y ta sigui surpasa expectativa. Conforme e demanda por mira tambe con aerolineanan a sigui expande capacidad Aruba y asina permitiendo nos captura e demanda halto. Te cu maart 2024, Aruba a ricibi un total di 141,380 bishitante “stayover”, un crecemento di 25.8%, compara cu maart 2023, unda a ricibi 112,417 bishitante “stayover”. Esaki a bira un berdadero record pa pais Aruba, pasobra nunca antes nos a yega di maneha tanto turista asina den un solo luna. E record tabata na december 2023, ora Aruba a ricibi 127 mil pasahero.
MAYORIA A KEDA DEN AIRBNB
Na maart 2024, 83.9% di e total di e bishitantenan “stayover” pa Aruba a yega for di Norte America, 4.1% a bishita for di Europa, 9.9% a bishita for di Latino America y 2% tawata procedente di otro partinan di mundo.
Un total di 27.7% di bishitante a keda den hotel European Plan, 14.5% a keda den hotel All-Inclusive, 23.7% a keda den Timeshare y 34.1% a keda den otro tipo di acomodacion, conoci tambe como short-term vacation rentals (STVR).
AÑA RECORD
Te cu maart 2024 (Q1), Aruba a ricibi un total di 381,877 bishitante “stayover”, un crecemento di 22.4% compara e prome kwartaal di aña 2023, unda a ricibi 311,984 bishitante “stayover”. Te cu maart 2024 (Q1), 82.3% di e bishitantenan ta di Merca, 4.7% di Europa, 10.8% di Latino America y 2.2% di otro parti di mundo.
CORSOU
Na luna di maart 2024, Corsou a registra un record nobo. El a bira e miho luna pa turismo den historia cu 63.556 turista di estadia. Oficina di Turismo di Corsou (CTB) ta contento pa anuncia un crecemento impresionante di 38% den cantidad di bishitante compara cu maart aña pasa. E ultimo weekend di maart ta e momento cu a midi e top di mas halto, cu un cantidad grandi di turista cu a scoge pa pasa nan vakantie di Pasco di Resureccion na Corsou. Aña pasa, pues na 2023, Corsou a ricibi 582.400 turista, cu tabata un crecemento di 19% compara cu e aña prome.
BONEIRO
Boneiro a anuncia un logro historico na momento cu a informa cu e isla e ricibi un cantidad record di 18.169 bishitante den luna di maart 2024. Esaki ta representa un aumento di aproximadamente 10% di aña 2023 pa aña 2024 y un crecemento di aproximadamente 13.5% for di aña 2019 pa aña 2024. E bishitantenan Hulandes ta keda e grupo di mas grandi, representando 39% di e cantidad total, sigui pa Mericanonan cu ta representa 29%. Corsou, Canada, Alemania y Aruba a contribui significativamente den e sector turistico di Boneiro.
Den luna di maart 2024, Boneiro a experencia un aumento notabel di 37% di bishitante Mericano den comparacion cu e aña anterior y un aumento substancial di 186% di bishistante procedente di Canada. E crecemento den bishitante Mericano ta debi na e cantidad di vuelo di United, Delta, American Airlines y e yegada di e vuelo nobo di WestJet for di Toronto, Canada. A pesar di e tendencianan positivo, tabatin un disminucion chikito den cantidad di pasahero Hulandes, cu a baha di 7541 na aña 2023 pa 7120 na aña 2024, cu ta representa un caida di aproximadamente 5.6%. E caida aki ta debi na reduccion den frecuencia y asiento disponibel pa e ruta Amsterdam-Boneiro debi na cambio di avion y na e cantidad di rotacion cu tabatin programa.
AÑA 2023 PA ISLANAN ABC
Ora repasa aña 2023, ta nota cu tur tres isla a conta cu un crecemento impresionante den turismo. Aruba a yama bonbini na 1.24 miyon turista, cu a representa un crecemento di 11% compara cu aña 2019, cu tabata e miho aña prome cu Covid. E mercado Mericano ta esun di mas importante. Corsou a cera aña 2023 cu 582.409 turista, un crecemento di 19% compara cu aña 2022. Hulanda ta nan mercado di mas grandi, cu 36%, sigui pa Merca cu 24.2% y na di tres luga Colombia cu 6,8%. Boneiro a conta cu no menos di 169,706 turista na aña 2023. Esaki ta representa un crecemento di 8% compara cu aña 2019, prome cu pandemia. Na aña 2019 nan a ricibi 157,000 turista y na aña 2022 a yama bonbini ma 169,200 turista. Pues e crecemento di aña pasa ta solamente di 0,2%.
TOCANTE ARUBA TOURISM AUTHORITY (A.T.A.)
Desde 1 di januari 2011, Aruba Tourism Authority ta opera como un entidad ‘Sui Generis’. Un organisacion independiente di e esfera publico. Aruba Tourism Authority ta fungi como ‘Destination Marketing and Management Organization (DMMO)’ y ta responsabel pa uni interes turistico entre socionan local e internacional.
Aruba Tourism Authority a cuminsa cu 822 mil turista pa aña na 2011, te awo cu a alcansa 1.4 miyon turista via aeropuerto, na aña 2024. Esaki ta encera un crecemento di 47%. Den aspecto economico, loke e turista ta laga atras, e “Tourism Receipts, na aña 2013 tabata mas o menos 2.7 miyon florin y na 2024 ta 5.2 miyon florin, un crecemento di 92%.
A.T.A. ta enfoca riba e modelo “High Value-Low Impact”, un balans entre aumenta balor economico di e bishitante, posiciona Aruba como un pais desea y sostenibel y posiciona Aruba como lider di desaroyo como un destinacion. Cu meta pa sigui mantene esfuersonan den linea segun e balans menciona y logra aumenta entrada pa medio di calidad di turismo en bes di e volumen cu nos destinacion ta ricibi. Capacidad di carga ta sigui ricibi atencion di A.T.A.
