Na prome lugar nos kier duna nos palabra di felicitacion na tur scout y guia na Aruba pa cu e dia di awe 22 di Februari riba cual nos ta celebra fecha natal di nos fundador Lord Robert S.S. Baden-Powell. Tambe riba e dia aki nos rumannan Padvindsters di Het Arubaanse Padvindsters Gilde (APG) ta celebra “World Thinking Day”.
Lord Baden Powell a cuminsa scouting na aña 1907 na Inglatera y for di e tempo ey te awendia e vision y mision cual ta sinta na fundeshi di Scouting a sigui innova asina cu nos por sigui brinda formacion por medio di educacion no formal na hubentud di Aruba. Scouting su meta principal ta pa educa hobennan util y responsabel pa nos comunidad caminda cu nan ta prepara pa haci un impacto constructivo den nan propio bida, pa cu nan famia y comunidad dia di mayan ora nan ta adulto.
Riba e dia aki tambe nos ta reflexiona riba e proposito, nificacion, ley y promesa di Scouting. Tambe tur e memorianan, amistad y actividadnan cu nos a pasa aden tanto nacional como internacional durante nos periodo den scouting. Kende cu tabata scout no ta corda algo unico y special cu ela experencia unicamente den scouting of padvinderij durante bijeenkomst semanal, dia di marcha of durante un weekend di campamento? Tur e momentonan special aki ta bini bek na nos pensamento ora topa amigonan di infancia o colega lidernan y corda riba nos dushi tempo den scouting pasado y presente.
Special e aña aki ta cu Scouting Aruba a organisa un Social Media Challenge caminda tur su miembronan por post nan potret faborito di Scouting cu e hashtag: #scoutingarubafoundersday. Asina promoviendo scouting y participando pa gana premio pa mas likes.
Anualmente Scouting Aruba ta organisa diferente evento y actividad recreativo y educacional pa tur su miembronan hubenil y tambe diferente curso di formacion pa tur su lidernan adulto kendenan ta contribui na e formacion di e miembronan hubenil.
Rond mundo scouting tin mas cu 50 miyon miembro cu organisacionnan scout activo na tur pais rond mundo. Scouting Aruba tin actualmente mas cu 500 miembro parti den 12 grupo rond di Aruba. Scouting ta existi na Aruba pa casi 90 aña caba. Asociacion Scouting Aruba a wordo forma mas of menos 20 aña pasa pa uni tur grupo bou di un solo organisacion cu laso y afiliacion mundial cu nos organisacion madre The World Organization of the Scout Movement. Scouting ta contribui na formacion di mucha y hoben entre edadnan di 5 pa 21 aña di edad. Pa mas informacion tocante Scouting por busca nos riba facebook, instagram of cel: 5945129.
