Diaranson, pa mas of menos 11'or y 50 di mainta, polis a wordo yama pa personal di un High Rise Hotel cu un muhe lo tabata dunando massage na turistananan.
Den cuadro di esaki comandante na warda a manda polis na dicho hotel. Polis a cana bay riba e looppad, y a yega na e prome piscina, unda cu nan a mira un muhe bisti completamente na preto cu un sombre grandi riba cabes, tabata acercando varios turista. Polis a mira cu den su mannan e tabata tin un flyer y cu tabata splica e turistanan un ke otro. Despues el a bay na un turista cu tabata sinta riba stoel y a cuminsa dun'e massage na su pianan. Polis a acerca e muhe y a puntr'e kico e tabata haciendo.
El a declara cu e tabata dunando e turista un masage. Polis a puntre si e tabata tin un permiso, cual e no por a mustra. Polis a puntre pa bin warda y pa e identifica su mes. Na warda el a bin y a identifica su mes como RKYA, naci na Venezuela y kedando na Punto di Oro Appartments na Tanki Leendert. El a declara cu e no tabata sa cu e no mag di traha sin permiso. RKYA a wordo pasa pa Warda nos Costa. Comandante na warda a wordo poni na altura.
