Diabierna, dia 10 di december proximo, Movemento Pro Derecho Humano ta organisando un marcha saliendo fo’i Julianaschool direccion Parlamento di Aruba, pa asina vocifera e preocupacion cu tin rond di e vacuna.
KEN TA MOVIMENTO PRO DERECHO HUMANO
Movemento Pro Derecho Humano ta un grupo cu tin como meta pa sali na defensa di derecho humano di tur hende.
Nos tur por a mira y observa e desaroyonan cu ta bin ta tumando luga door di COVID rond mundo, caminda Aruba no a keda atras den esaki. Na comienso di e pandemia nos ningun na Aruba no tabata compronde mucho bon kico tabata pasando y kico tur daño un virus desconoci por a haci cu nos.
A sembra hopi miedo den pueblo, caminda tur hende a keda cera den nan cas pa varios luna largo cu hopi temor pa pega cu e virus.
Segun tempo a pasa, ya den e di dos ola caba (augustus 2020) por a mira cu mayoria hende ta recupera di e virus sin problema. Segun RIVM di Hulanda e chens pa fayece di COVID ta 0.15% compara cu e influenza cu ta 0.16%.
Na februari cu a pasa, gobierno pa medio di DVG a introduci un campaña nunca bisto na Aruba p’e vacuna di Pfizer. A pint’e como un hopi sigur, di confia y aproba. Aki a priminti pueblo cu dos vacuna lo yuda Aruba recupera su economia y tambe evita cu e virus lo sigui plama.
Por bisa un campaña exitoso, pasobra te cu e ultimo Vacunathon cu a pasa e fin di siman aki, ainda hende a bay tuma e vacuna y hopi a bay p’e di 3 shot.
Tambe e mandatarionan a bisa varios biaha den e conferencianan di prensa y tambe riba medio social cu e vacuna aki NO ta obligatorio.
E ta a base boluntario pa esunnan cu kier tum’e. Tambe a bisa esunnan cu no tum’e mester deal cu e consecuencianan si ora cu e virus bati na nan porta.
Na Aruba ainda tin grupo cu no ta desea di vacuna y ta pidi pa respeta nan decision sin cu esaki tin consecuencia pa nan riba tereno laboral, social y medico.
Segun e movemento, den nos Grondrechten articulo 1.3 di nos Staatsregeling ta para: “Een ieder heeft behoudens bij of krachtens landsverorderning te stellen beperkingen, recht op aantastbaarheid van het lichaam.” Ningun hende mag forsa bo sin mas pa tuma un vacuna cu abo mes no kier.
Movemento Pro Derecho Humano a bin ta observa caminda a cuminsa bira un tendencia p’e doñonan di trabou, pa exigi su trahadonan pa bay vacuna y duna nan un ultimatum pa trece prueba di vacunacion, sino nan ta perde nan trabou.
Tambe nos por a mira varios vacatura ta sali cu ta tuma solamente hende vacuna pa traha. “Nos hendenan kier traha pero NO por pasobra no kier respeta un escogencia personal medico!
E ta husto pa mama y tata di famia ta poni bou presion asina?”
Nos por a mira hopi desunion ultimamente riba medio social caminda tin persona vacuna ta menosprecia un otro cu no a vacuna y ta haya cu e hendenan aki no tin derecho pa haya cuido medico y tampoco forma parti di sociedad. Cu otro palabra keda den bo cas cera henter dia.
Mientras tanto nos tur por a observa cu e dos vacunanan no a evita contagio y cu hende vacuna dos biaha tambe ta bira malo y algun di nan hopi malo. Na e momentonan aki Aruba ta dunando caba e di boostershot apenas 8 luna despues cu a cuminsa vacuna.
Ya caba Hulanda a introduci e QR code. Na Corsou tambe nan ta bezig cu ne y na Aruba por a scucha algun siman atras cu e QR code pa Aruba tambe ta den discusion.
Movemento Pro Derecho Humano ta rechasa e tipo di desaroyo aki rotundamente pasobra e ta contra derecho di ser humano. Nos futuro no por depende di un vacuna!!
Libertador Betico Croes a lucha hopi aña largo pa nos libertad y nos por mira cu pocopoco ta trapa riba derecho y libertad di nos ciudadanonan.
Dia 10 di December ta dia di Derecho Humano, decreta pa Nacionnan Uni na aña 1948.
Movemento Pro Derecho Humano kier a haci un invitacion na tur persona cu ta sinti nan mes yama pa para pa derecho humano, sin importa cu a vacuna of no, pa asisti na un marcha riba e mesun dia, saliendo pa 4:00 pm fo’i Julianaschool pa Parlamento di Aruba pa entrega varios punto. Ya caba lo reuni fo’i 3:30 pm.
“Nos pueblo di Aruba hamas mester ta dividi pa via di un vacuna. Gobierno tin e tarea pa UNI e pueblo aki pasobra asina so nos lo sobresali riba tur obstaculo.”
