Pa fraccion di RAIZ, Misha Raymond ta esun cu a biaha pa ta presente den IPKO, unda cu nan a haya diferente presentacion. Un di e puntonan riba mesa cu mester a discuti riba dje ta geschillenregeling, pero no a haci esey. Tambe e kier pa ora nan reuni trata mas riba kinderrechten.
Esaki ta di dos biaha cu RAIZ ta participa den reunion di IPKO, cual e prome tabata na Sint Maarten di e aña aki. Esey ta pone cu Misha Raymond, lider di partido RAIZ, tin sentimento con esaki ta bay. El a indica cu e idea di IPKO ta pa trece tur Parlamento di Reino hunto pa asina discuti e cosnan cu ta riba mesa. E biaha aki tin geschillenregeling, pero tabata tin un mal comunicacion y no a discuti esaki mas.
“Pa loke ta ami mes, temanan cu mi kier wak bin mas dilanti ta kinderrechten. Pero esey tambe mi a tuma un rol activo den esaki, den e tripartiet, cu ta e reunion cu ta tuma luga prome cu nos sinta cu e Parlamento di Hulanda”, e parlamentario a indica. Raymond a vocifera esey cu e otro parlamentonan di e islanan. El a ricibi sosten riba esey pa pone riba agenda, probablemente n’e siguiente IPKO e lo haci esey. E ta bay trece esaki den e siguiente encuentro di tripartiet.
RELACION DEN REINO
Loke ta trata relacion den reino semper ta bin dilanti, cual ta un punto di agenda cu semper por mehora esey. Raymond ta sinti cu tur proceso, e procedura, e protocolnan cu a tuma luga despues di Covid pa loke ta e landspakket, Rijkswetten cu tabatin riba mesa, e no ta kere cu esey a mehora e relacion. E ta di pensamento cu nan mester a bin mas hunto pa discuti e proceso con ta bayendo.
E ta sinti e interes di Hulanda pa sa kico a bay fout, kico ta e sentimento di e islanan y con pa mehora esey. Tension tin y ta bay keda ora tin tanto tempo sin papia cu otro, tanto tempo sin delibera, pero Raymond ta habri pa mira di ki banda tur cos por pasa y ki banda ta dispuesto pa mehora e relacion.
BALOR DI IPKO Pa bay IPKO tin su balor, y segun Raymond, no por existi den Reino sin tene cuenta cu mester traha riba e relacion. E manera con IPKO ta tuma luga, e ta algo pa bini hunto y ta bon. Esaki ta pa motibo cu tin momento oficial, pero tambe tin momento inoficial cu por papia y delibera pa mira con ta yega na e cosnan importante.
