Ausencia di parlamentario Misha Raymond den e prome reunion pa trata presupuesto di Tourism Product Enhancement Fund (TPEF), a causa hopi speculacion. Awe cu a reunion a sigui, el a bini pa caba cu tur speculacion. Cu palabranan cla el a duna di conoce cu su profesion ta mas importante cu politica ya cu e ultimo aki no ta pa semper.
Manera por corda, algun siman atras no a logra haya aprobacion presupuesto di TPEF pa motibo cu coalicion no tabatin suficiente parlamentario presente pa forma quorum.
Na momento di hiba palabra Misha Raymond, lider di fraccion di Raiz cu ta forma parti di e coalicion, a cuminsa bisa cu un hari un tiki sarcastico “a crea hopi sensacion pasobra mi no a bin un reunion”. A enfatisa cu el a avisa adelanta cu e no por ta presente e dia ey “pasobra mi tabatin otro obligacionnan”. E ultimo punto aki ta algo cu Presidente di Parlamento no a menciona of no a haya e obligacionnan aki di Raymond importante manera e tema di e reunion.
Ya cu e ora lo no mester a yama e reunion pa evita e perdemento di cara di e dia ey pa e minister. Parlamentario Raymon a splica cu pa motibo cu e ta registra na diferente instancia, cada tanto tempo, mas ainda si e no ta den practica, e mester pasa cierto testnan of curso pa mantene su acreditacion valido. Y mester cumpli cu nan pasobra “politica no ta pa semper. Mi sa cu tin hende aki den cu ta haci comosifuera esey ta e caso. Pero politica no ta pa semper. Mi no ta bay perde mi registracion pa sensacion y politica.
Mi no ta bay haci’e. Aruba mester di nos tur berdad, pero mas di e profesionalnan cu kier keda profesional,” el a bisa. Pero esey no tabata tur di e un poco mas di dos minuut di splicacion cu el a duna den parlamento. “Loke mas ta asombra mi ta un lider di AVP cu a boga pa esaki, pasobra hende drechi no ta drenta politico pa miedo di perde acreditacion, ta tuma un actitud asina.” Despues di a tira e flecha riba AVP, el a sigui pa otronan. “Mi ta para aki den cu orguyo, pero cu orguyo mi kier mantene mi registracion y no ta cambia esey tampoco.”
Na final el a critica e actitud tuma door di miembronan di oposicion cu no a drenta sala pa yuda e coalicion forma quorum pa trata e ley di TPEF.
Den algun palabra cu Misha Raymond a trece dilanti tabata parce cu esaki tabata dirigi na Minister di Turismo Dangui Oduber, kende tabata masha rabia ora cu e reunion publico no por a sigui e prome biaha. Mas pasobra tabata hustamente Raymond tabata ausente, un di e parlamentarionan cu tabata push’e cu pregunta relaciona cu profesional cu AZV a keda di contrata na januari.
Mirando e ausencia di Misha, dado momento e minister den declaracion a bisa “bay puntra e parlamentario mes pakico e tabata ausente”. Y awo algun palabra cu e mesun parlamentario aki a expresa tabata parce pa Dangui Oduber, aunke el a sigui bisa su tras “anto no bira parlamentario”.
“Si bo trabou ta depende di mi presencia, anto no bira parlamentario. Duna un otro cu si kier haci e trabou. No bin grita aki den cu bo no ta presenta despues cu bo a firma, pasobra politica ta mas importa. Laga politica un banda y bin haci bo trabou,” tabata e mensahe cu el a manda pa e miembronan di oposicion.
