Den un relato di prensa, Mireille Sint Jago, candidato number 4 di partido Pueblo Prome kier a comparti su pensamentonan riba ‘dicon e ‘pakico’ ta mas importante cu ‘kico’ y e ta bisa lo siguiente:
“Bon dia Aruba, ata mi aki atrobe den e arena politico. Pakico? Pa e simpel motibo cu mi sa cu mi por contribui na nos Enseñansa na un manera positivo, constructivo y efectivo. Mi di tres eleccion y di tres partido. Pakico? Mi lo splica esey despues. Locual mi kier comparti prome cu pueblo di Aruba ta lo siguiente: “E importancia di Transparencia den Enseñansa.” Den otro palabra, ‘e pakico ta mas importante cu e kico.’
Ora ta toca e topico di Enseñansa, tur hende tin un opinion. Esey ta algo logico, pasobra e ta locual nos tur tin en comun. E dolor cu bo ta sinti ora bo faya of e alegria di victoria ora bo a surpasa tur e obstaculonan cu nos Enseñansa tin. Sea bo experiencia tabata uno super bon pa bo, of gewoon bon, of porta e tabata mas of menos, menos agradabel, of simplemente horibel. Locual nos tin en comun… esey ta uni nos tur! Caminda hende ta traha, eror por sosode. Esey ta haci nos humano. Sinembargo di chikito caba mayoria di nos ta siña cu nos mester sinti berguensa ora nos haci un eror, ora nos haci un fout. Pero no ta e fout ta locual ta importante, pero e pakico su tras.
Akinan un lista cortico di algun ‘pakico’ cu ora bo scucha nan, abo mes lo por imagina bo mes e ‘kico’ den dje:
1. Pasobra bo ta corda informacion mas lihe ora e ta den bo idioma materno.
2. Pasobra na Aruba no tin un diccionario cu por splica.
3. Pasobra nos no ta haci analisis cientifico di e resultadonan di examen.
Partido PUEBLO PROME tin un vision pa strica e obstaculonan cu nos mucha y studiantenan ta topa cu ne tur dia den nos enseñansa. Pone asfalt riba e caminda di enseñansa!! Nos kier yega na e ‘con’ di e ‘dicon’.
1. Con nos por yuda hisa e resultado y e nivel di educacion di nos muchanan, nos hobennan, nos adultonan y henter nos pueblo?
2. Con grandi e vocabulario y comprension ta, den dos, tres of tur cuater idioma, di nos muchanan, studiantenan, mayornan y maestronan.
3. Con nos por basa e decisionnan haci den Enseñansa, mas riba un base cientifico enbes di opinion.
Ora bo lesa e Relato Estadistico Anual cu ta sali aña den aña afo di Departamento di Enseñansa, e ta falta hopi informacion. Claro cu e ta importante pa sa cuanto mucha ta bay cua tipo di scol, cua promedio di edad e maestronan di un scol tin of cua resultadonan a logra durante e examen, pero esey ta solamente e ‘kico’, no e ‘pakico’. Partido PUEBLO PROME ta cla pa conhuntamente cu pueblo henter, trece e cambio necesario, pa busca solucionnan pa basa e decisionnan haci den Educacion riba dato y analisis pa traha riba un solucion. Pa recoge e datonan di nos enseñansa na un manera anonimo y laga Dienst Inspectie Onderwijs, CBS, EPI, IPA y Universidad di Aruba traha hunto.
Pakico nan a bolbe invita mi y a acepta pa subi lista di Partido PUEBLO PROME? Despues di un analisis di tur locual a pasa mi na 2017, cual a ripiti su mes atrobe e aña aki, mi a realisa cu tin obstaculo pa kita den politica tambe!!! P’esey mi lema faborito ta keda: “Winners Never Quit y Quitters Never Win.” Un dia e CAMBIO NECESARIO lo bin den nos enseñansa tambe y PUEBLO lo ta esun cu lo sali gana!!!”
