Manera ta conoci, diahuebs 22 di december, Minister di Naturalesa, Ursell Arends a ofrece un conferencia di prensa caminda el amplia riba e maneho nobo cu ta bin pa cu procesamento di desperdicio den cuadro di e ciere di Parkietenbos dia 31 awo. Tin diferente compania encarga cu almacenamento y procesamento di sushi, segun su tipo; sinembargo Arends a descarta cu esaki ta habri caminda pa creacion di varios dump chikito rond di e isla.
E reaccion a bin tras e pregunta di periodista Hilario Donker. E mandatario a splica cu tin un regulatory framework cu ta inclui un standard cu e companianan mester atene nan mes. E set di standard ta traha door di Directie Natuur en Milieu (DNM) y ta basa riba nivel Europeo y halto. Tanto e compania cu ta opera den freezone y pafo di freezone mester cumpli cu nan, segun e minister.
“Esey ta loke nan ta firma den nan acuerdo y esey ta loke gobierno su tarea ta, pa facilita e tipo di regla y regulacion cu e companianan aki mester ehecuta. A traves di esaki nos ta garantisa cu e companianan mester cumpli y si nan no hacie, nos tin e autoridad tambe ekipa pa atende cu nan. Entre otro BCI y DNM cu mester treedt op ora cu nan no ta atene nan mes na e reglanan,” asina Minister Arends a bisa, indicando tambe cu tin posibilidad di duna boet y hasta kita nan permiso.
E titular di naturalesa ta kere cu esaki ta e manera cu mester cuminsa atende e responsabilidad. E ta di cada un di nos como ciudadano riba con ta atende cu desperdicio, pero tambe ta di cada un di e companianan aki cu a pone nan mes disponibel y a haci inversion pa cuminsa procesa desperdicio den un forma duradero y adecua.
Arends: “Nos como gobierno no lo tolera cu nos ta bay bek den pasado. Manera mi a bisa aworey, Parkietenbos ta pasa pa pasado y tur e practicanan iresponsabel di anda cu desperdicio tambe ta pasa pa pasado. Tur e companianan aki a forma parti di e proceso pa yega na e maneho di desperdicio. Nan a forma parti di e dies principio y di e creacion di e blueprint.”
