Pa 2023, no ta mustra un aña colo di rosa, teniendo cuenta cu tur e medidanan cu tin cu bin. Asina presidente di Organisacion Pensionado Publico Arubano (OPPA), Ivo Valdes a indica.
El a sigui bisa cu segun OPPA, como organisacion, tin hopi di traha riba diferente aspecto cu tin di haber cu e grandinan.
Valdes ta spera cu tin energia suficiente y cu gobierno cada bes corda cu e grandinan ey a traha pa Aruba y ki ora cu nan tin nan plannan, nan envolve OPPA tambe pa yuda bin cu idea con pa soluciona e problemanan cu Aruba ta hayando.
Aruba desde su Status Aparte tur locual cu el a acumula na cantidad grandi, ta un debe. Pakico? Pasobra tur e instancianan cu a ‘trek aan de bel’, bisando nos gobernantenan cu no por sigui maneha e pais den e forma financiero-economico, manera cu nan ta haciendo, nan no a scucha e instancianan ey y a haci loke nan kier.
Ta di lamenta cu nos politiconan keto bay ta coy e caminda di mas facil pa soluciona cierto problema cu a lo largo ta bay crea problema social, segun Valdes.
Cu esey Valdes kiermen cu por ehempel lo bay bin mas hotel, mas migrante lo bay bin, mas famia lo bay bin. Nos scolnan casi no tin cupo mas. Lo bay pone presion rib’e scolnan, presion riba nos fondonan social, presion riba e infrastructura di Aruba.
Aworaki caba tin un trafico hopi pisa. Imagina cu mas hotel keda cla, mas hende bin Aruba. “Unda nos ta bay. Ta riba bicicleta nos lo bay cuminsa move,” Valdes a indica. Tur e cosnan aki mester conscientisa e hendenan kico ta bay pasa. Kico ta bay pasa cu nos grandinan, el a cuestiona.
Aworaki caba nan tin problema, el a indica. Como organisacion, OPPA tin hopi pa haci y ta spera cu e ‘Ouderenraad’ por bin pa caba y por duna un ayudo n’e maneho pa nos grandinan na gobierno. Esey ta un tarea grandi cu OPPA tin pa otro aña y ta spera cu e por bira realidad.
Cu esaki, Valdes a bisa cu p’e cambio di aña ta desea tur miembro y pensionado un feliz dia di fiesta, un feliz cambio di aña y ta spera cu tur loke cu trece dilanti actualmente, ta otro e siguiente aña, den un forma mas positivo, bunita y cu nos grandinan tin e miho, Valdes a bisa.
“Mi kier pa nos grandinan biba trankil, feliz y yen di alegria,” el a bisa por ultimo.
